ԱՄՆ նախագահն ու առաջին տիկինը ժամանել են Չինաստան (լուսանկարներ, տեսանյութ)
Միացյալ Նահանգների նախագահ Դոնալդ Թրամփն առաջին տիկին Մելանյա Թրամփի ուղեկցությամբ ժամանել է Չինաստան, հայտնում է New York Daily News-ը՝ նկատելով, որ ասիական շրջագայության ընթացքում սա ԱՄՆ նախագահի 3-րդ կանգառն է: Նախքան այս նա այցելել էր Ճապոնիա ու Հարավային Կորեա:
Հայտնի է, որ 71-ամյա Թրամփը Միացյալ Նահանգների ղեկավարի պաշտոնում առաջին անգամ է Չինաստան ժամանում:
Նշվում է նաև, որ մայրաքաղաք Պեկինի կենտրոնում գտնվող «Արգելված քաղաքը», որն իրենից հին կայսերական համալիր է ներկայացնում ու սովորաբար լեփ-լեցուն է լինում զբոսաշրջիկներով, Թրամփի այցի կապակցությամբ դատարկ է եղել:
Աղբյուրը մանրամասնում է, որ Թրամփն ու Չինաստանի ղեկավար Սի Ծինփինը կանանց ընկերակցությամբ թեյել են:
Ենթադրվում է, որ երկօրյա այցի ընթացքում Թրամփը չինացի գործընկերոջ հետ կքննարկի գլխավոր տարածաշրջանային հարցը՝ հյուսիսկորեական սպառնալիքը, որի շուրջ Վաշինգտոնն ու Պեկինն ունեն մի շարք տարաձայնություններ:














