ՄԽ համանախագահները պատրաստվում են մինչև տարեվերջ կազմակերպել Հայաստանի և Ադրբեջանի ԱԳ նախարարների հանդիպումը. ՌԴ ԱԳՆ (տեսանյութ)

15:43 • 09.11.17

Լեռնային Ղարաբաղի հակամարտության կարգավորմանը նվիրված Ժնևի գագաթնաժողովի արդյունքները հաշվի առնելով՝ ԵԱՀԿ Մինսկի խմբի համանախագահները պատրաստվում են մինչև տարեվերջ կազմակերպել Հայաստանի և Ադրբեջանի արտգործնախարարների հանդիպումը:


Այդ մասին հինգշաբթի ճեպազրույցի ընթացքում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:


«Ես կարող եմ ասել, որ Լեռնային Ղարաբաղի հակամարտության հարցով Ժնևի գագաթնաժողովի արդյունքները հաշվի առնելով՝ ԵԱՀԿ Մինսկի խմբի համանախագահները պատրաստվում են մինչև տարեվերջ կազմակերպել Հայաստանի և Ադրբեջանի արտգործնախարարների հանդիպումը: Այդ շփումները նախատեսված են՝ համաձայն հոկտեմբերի 16-ին ձեռք բերված պայմանավորվածությունների»,- ասել է ՌԴ ԱԳՆ ներկայացուցիչը:


Զախարովան հավելել է, որ քննարկվում են նաև այլ ձևաչափերով հանդիպումներ:


«Ինչ վերաբերում է տարբեր ձևաչափերով հանդիպումներին, դրանք նույնպես չեն բացառվում և մշակման փուլում են»,- հավելել է նա:


Հիշեցնենք, որ ՀՀ փոխարտգործնախարար Շավարշ Քոչարյանը չէր հերքել, որ Արցախի հակամարտության կարգավորման շրջանակում Հայաստանի և Ադրբեջանի արտգործնախարարների հանդիպում նախատեսված է: Նա ԱԺ-ում լրագրողների հետ զրույցում նշել էր, որ դեռևս հայտնի չէ, թե հանդիպումը երբ կլինի:

 

Տեսանյութում այդ հատվածը կարող եք լսել 44.12 րոպեից.