Եվրոպայում հայտնված ռադիոակտիվ ամպի պատճառը հավանաբար եղել է ՌԴ-ում կամ Ղազախստանում տեղի ունեցած արտահոսքը. IRSN

14:02 • 10.11.17

Եվրոպայում վերջին շաբաթների ընթացքում հայտնված ռադիոակտիվ ամպը ցույց է տալիս, որ Ռուսաստանի կամ Ղազախստանի միջուկային օբյեկտներից մեկում սեպտեմբերի վերջին շաբաթվա ընթացքում հնարավոր է վթար է տեղի ունեցել: Այդ մասին հայտնել է Ֆրանսիայի միջուկային և ռադիացիոն անվտանգության ինստիտուտը (IRSN), հաղորդում է Reuters գործակալությունը:


IRSN-ը ենթադրում է, որ արտահոսքը կարող է տեղի ունեցած լինել միջուկային վառելիքի վերամշակման օբյեկտում կամ միջուկային բժշկությամբ զբաղվող կենտրոնում՝ բացառելով միջուկային ռեակտորում վթարի հավանականությունը:


Ինստիտուտը, որը Ֆրանսիայի միջուկային անվտանգության գործակալության տեխնիկական ստորաբաժանումն է, հայտնել է, որ չի կարող հստակ որոշել ռադիոակտիվ նյութի արտահոսքի վայրը, բայց, հիմնվելով եղանակային պայմանների վրա, ենթադրում է, որ այն հավանաբար տեղի է ունեցել Ուրալյան լեռներից հարավ ընկած հատվածում: Դա կարող է նշանակել, որ արտահոսքը տեղի է ունեցել Ռուսաստանում կամ Ղազախստանում, նշել են IRSN-ի աշխատակիցները:


«Ռուսաստանի իշխանությունները նշել են, որ տեղյակ չեն իրենց տարածքում տեղի ունեցած վթարի մասին»,- հայտնել է IRSN-ի տնօրեն Ժան-Մարկ Պերեսը: Նա հավելել է, որ ինստիտուտը դեռ չի կապվել Ղազախստանի իշխանությունների հետ:


Reuters-ին չի հաջողվել անմիջապես կապ հաստատել Ղազախստանի իշխանությունների հետ:


Պերեսը նշել է, որ վերջին շաբաթների ընթացքում IRSN-ն և մի քանի այլ եվրոպական ինստիտուտներ գրանցել են ռադիոակտիվ իզոտոպ ռութենիում 106-ի բարձր մակարդակ:


IRSN-ի գնահատականով՝ լուրջ արտահոսք է տեղի ունեցել, և եթե այդ մասշտաբի վթար տեղի ունենար Ֆրանսիայում, անհրաժեշտ կլիներ մարդկանց տարհանում՝ դեպքի վայրից մի քանի կիլոմետր շառավղով:


IRSN-ն հայտնել է, որ Եվրոպայում օդում գրանցված ռութենիում 106-ի խտությունը վտանգ չի ներկայացրել մարդկանց առողջության և շրջակա միջավայրի համար: