Պուտինն ու Թրամփը համատեղ հայտարարություն են տարածել Սիրիայի վերաբերյալ
Ռուսաստանի Դաշնության նախագահ Վլադիմիր Պուտինն ու նրա ամերիկացի գործընկեր Դոնալդ Թրամփը վերահաստատել են իրենց վճռականությունը Սիրիայում «Իսլամական պետություն» ահաբեկչական խմբավորմանը ջախջախելու հարցում:
Ինչպես նշում է Al Arabiya-ն, այս մասին ասվում է ղեկավարների համատեղ հայտարարությունում, որում նաև նշվում է, որ Մոսկվան ու Վաշինգտոնը համակարծիք են այն հարցում, որ սիրիական հակամարտությունը չունի ռազմական լուծում:
Ria.ru-ն հավելում է, որ հայտարարությունը տարածվել է Վիետնամում Ասիա-խաղաղօվկիանոսյան տնտեսական գագաթնաժողովի շրջանակում երկու ղեկավարների կարճատև շփումից հետո:
«Թե՛ Պուտինը, թե՛ Թրամփն իրենց հավատարմությունն են վերահաստատել Սիրիայի ինքնիշխանությանը, անկախությանը, միասնականությանն ու տարածքային ամբողջականությանը»,-նշվում է հայտարարությունում:
Բացի այդ, նախագահները կոչ են արել սիրիական հակամարտության բոլոր կողմերին ակտիվ մասնակցել ժնևյան բանակցություններին, որոնց նպատակը հակամարտության խաղաղ կարգավորմանը հասնելն է:
Պուտինի խոսնակ Դմիտրի Պեսկովը մանրամասնել է, որ համատեղ հայտարարության տեքստը կազմել են երկու երկրների փորձագետները, ինչից հետո փաստաթուղթը համաձայնեցվել է ՌԴ արտաքին քաղաքական գերատեսչության ղեկավար Սերգեյ Լավրովի ու ԱՄՆ պետքարտուղար Ռեքս Թիլերսոնի հետ:










