«Սուրբ Աստվածամայր» ԲԿ-ում 5 տարեկան երեխա է մահացել

Երեկ՝ նոյեմբերի 12-ին, «Սուրբ Աստվածամայր» բժշկական կենտրոնում 5 տարեկան երեխայի մահացության դեպք է գրանցվել: Տեղեկությունը Tert.am-ի հետ զրույցում հաստատեց «Սուրբ Աստվածամայր» բժշկական կենտրոնի վիրաբուժության գծով փոխտնօրեն, տնօրենի պաշտոնակատար Դավիթ Դալլաքյանը: 

Մահացած երեխան Վեդի քաղաքից էր: Սկզբում նրան տեղափոխել են Վեդիի հիվանդանոց, իսկ դեպքից 4-5 օր առաջ երեխան տեղափոխվել է Երևան:

Դավիթ Դալլաքյանը վստահեցրեց, որ երեխայի մահվան պատճառը Վեդիի հիվանդանոցից «Սուրբ Աստվածամայր» ԲԿ ուշ տեղափոխելու հետ կապված չէ: 5-ամյա երեխան ի ծնե ունեցել է հորմոնալ անբավարարություն:

«Երեխան արդեն ծայրահեղ ծանր վիճակում ընդունվել է Վեդիի հիվանդանոց: Շտապ օգնության մեքենայի մեջ երեխայի մոտ սրտի կանգ է դիտվել: Արդեն ծանր վիճակում երեխան տեղափոխվել է Վեդիի հիվանդանոց, ամենայն հավանականությամբ՝ նեյրոինֆեկցիայի կապակցությամբ: Երեխային արհեստական շնչառության ապարատ է միացվել, հետո նոր մեր բրիգադը գնացել, բերել է նրան: Մեր հիվանդանոց ընդունման պահից երեխան եղել է արհեստական շնչառության ապարատին միացված, տերմինալ կոմայում»,- հայտնեց նա: