Ֆիլիպիններում ցուցարարները այրել են Թրամփի խրտվիլակը (տեսանյութ)
Ֆիլիպիններում ցուցարարներն այրել են ԱՄՆ նախագահ Դոնալդ Թրամփի տեսքով խրտվիլակը՝ ի նշան Թրամփի վարած քաղաքականության դեմ բողոքի, հայտնում է РИА Новости գործակալությունը:
Նշենք, որ Թրամփը Ֆիլիպինների մայրաքաղաք Մանիլա է ժամանել Հարավարևելյան Ասիայի պետությունների ասոցիացիայի գագաթնաժողովին մասնակցության շրջանակներում:
Ցուցարարները նախ ցանկացել են բողոքի ակցիան իրականացնել Միջազգային կոնֆերանս-կենտրոնի մոտ, որտեղ իրականացվում են գագաթնաժողովի գլխավոր միջոցառումները, սակայն կանգնեցվել են ոստիկանության կողմից:
Ակցիայի մասնակիցները վանկարկել են «ԱՄՆ՝ իմպերիալիստնե՛ր» և «Կա՛նգ առ, ամերիկյան պատերազմական մեքենա՛»: Խրտվիլակի ձեռքում եղել է փողով լի պայուսակ, ատրճանակ, բուլդոզեր և միջուկային հրթիռ: Հակաամերիկյան կոչերից հետո ցուցարարներն այրել են խրտվիլակը:
Որոշ աղբյուրներ պնդում են, որ ակցիային մասնակցել է շուրջ 3.000 ցուցարար, սակայն հստակ տվյալներ չկան: Ոստիկանության հետ բախումների կամ տուժածների մասին նույնպես տեղեկություններ չեն հաղորդվում:










