Տարկետման իրավունքի սահմանափակման դեմ բողոքող ուսանողների այսօրվա ակցիան ավարտվեց (թարմացված)
14.11
Կոնսերվատորիայի այգում ուսանողները որոշեցին ավարտել այսօրվա ակցիան: «Հանուն գիտության զարգացման» նախաձեռնության անդամ Դավիթ Պետրոսյանի խոսքով` դասադուլն անժամկետ է, շարունակվելու: Նրանք պատրաստվում են հանդիպել գիտնականների, քաղաքացիական հասարակության անդամների հետ:
Վաղը մեկնարկում է ԱԺ հերթական քառօրյա նիստի աշխատանքը, որի ընթացքում կքննակվի նաև «Զինվորական ծառայության և զինծառայողի կարգավիճակի մասին» օրենքի նախագիծը: Դասադուլի ակցիայի մասնակիցները պլանավորել են ԱԺ-ի դիմաց գնալ:
Իսկ կոնկրետ անելիքների մասով Դավիթ Պետրոսյանն առաջարկեց ավելի ուշ խոսել :
14.03
Կոնսերվատորիայի այգում խմբերի բաժանվելուց հետո դասադուլի ակցիայի մասնակիցներին առաջինը ողջունեց Ճարտարապետաշինարարարական համալսարանի ուսանողներից մեկը: Նա նշեց, որ իրենց բուհում ուսանողները հիմնականում իրազեկված չէին դասադուլի ակցիային, իսկ իրազեկ մարդկանց մի մասը չի հասկանում շարժման հիմնական նպատակը:
«Առաջին հերթին մեծ թվով ուսանողներ մեր շարժման մեջ ներգրավելու համար նախ անտեղյակներին պետք է իրազեկել, հետո արդեն իրազեկվածների հետ բանավեճի մեջ մտնել և հասկացնել ինչում է մեր խնդիրը»:
Պոլիտեխնիկի ուսանողն առաջարկեց նաև իրազեկման գործընթացում ներառել պաստառների ստեղծումը,ն աև օնլայն հարթակում իրազեկում իրականացնել և ստեղծել հավելյալ խումբ, որը կզբաղվի այդ իրազեկումով՝ շարժվելով համալսարանների լսարաններով և տեղում իրազեկելով ուսանողներին:
Ակցիայի մասնակիցներին ողջունեց նաև Ամերիկյան համալսարանի ուսանողներից մեկը:
«Մեր քննարկումը մի քիչ այլ ուղղությամբ էր գնում ոչ թե իրազեկման, այլ իրականում մեծ մասը նախաձեռնող խմբի անդամների առաջարկների հետ համաձայն է, բայց գտնում ենք, որ այդ ամենը այսքան ժամանակ չենք կարողացել լավ կամ ճիշտ ներկայացնել: Մեր հիմնական առաջարկն այն է, որ ներգրավենք մարդկանց, ովքեր ավելի փորձառու են կոնկրետ ոլորտներում, օրինակ օրենսդրական՝ սկսած իրավաբաններից»:
Ամերիկյան համալսարանի ուսանողի խոսքով` այսկերպ իրենք կփորձեն ավելի հիմնավորված առաջարկներ ներկայացնել կոնկրետ փաստաթուղթ մշակելով:

13.25
Դասադուլի ակցիայի մասնակիցները հասան Կոմիտասի անվան պետական կոնսերվատորիա: Այստեղ նույնպես պրոֆեսորադասախոսական կազմին ու ուսանողներին դիմեցին կոչով, որ իջնեն ու իրենց տեսակետը հայտնեն տարկետման իրավունքը սահամանափակող օրինագծի վերաբերյալ:
«Հանուն գիտության զարգացման» նախաձեռնության անդամ Դավիթ Պետրոսյանը նշեց.«Այսօր եկել ենք, որպեսզի լսենք նաև ձեր կարծիքը: Ես երեկ դրսում հանդիպեցի հայտնի մշակութային գործիչներից մեկին,ով ասաց, եթե ջութակահարը մի օր չնվագի կասկածի տակ կդրվի նրա գործունեությունը: Մի օրինակ էլ ես ասեմ՝ երաժշտարվեստում հայտնի Ռախմանինովը ասել է ,որ եթե մի օր ես չնվագեմ, չեմ կարող լսել, եթե երկրորդ օրը չնվագեմ իմ ընկերները ինձ չեն լսի, իսկ եթե երրորդ օրը չնվագեմ՝ ես հանդիսատես չեմ ունենա»,-նշեց Դավիթ Պետրոսյանը:
Պետրոսյանը նաև նշեց, որ շատերի կարծիքը, թե իրենք պաշտոնյաների հետ հանդիպումից հետո չէին հավաքվելու, հերքում է հենց ակցիայի մասնակիցների թիվը, որն ըստ նրա, այսօր ավելի մեծ է, քան նախորդող օրերին:
Կոնսերվատորիայի այգում Պետրոսյանը հավաքված ուսանողներին առաջարկեց տարբեր խմբերի բաժանվել` ըստ այն բուհի կամ ֆակուլտետի, որը ներկայացնում են: Խմբերի բաժանման նպատակը, ըստ Պետրոսյանի միմյանց հետ ծանոթանալն է ու առաջիկա անելիքները քննարկելը:
12.12
Ուսանողները փողոցի երթևեկելի հատվածով շարժվում են դեպի այլ բուհեր՝ «ազատ, անկախ ուսանող» վանկարկումով:
Տեղում աշխատող ոստիկանության աշխատակիցները հորդորեցին ուսանողների ազատել երթևեկելի հատվածը և երթը շարունակել մայթով:
Ուսանողները համաձայնեցին: Այս պահին նրանք շարժվում են այլ բուհեր
12.43
«Տարկետում լինելու է» վանկարկումով ուսանողները շարժվեցին դեպի Ագրարային համալսարան: Այստեղ ուսանողներին դիմավորեցին Ագրարային համալսարանի ռեկտորի տեղակալն ու պրոֆեսորադասախոսական կազմից ներկայացուցիչներ, ովքեր հրաժարվեցին խոսել լրատվամիջոցների և ուսանողների հետ՝ նշելով, որ այլևս խոսելու ոչինչ չունեն, նախորդ անգամ արդեն արտահայտել են իրենց տեսակետը, որով կողմ են այս օրինագծին:
«Հանուն գիտության» վանկարկումով ուսանողները շարժվեցին դեպի այլ բուհեր: Նրանք գնացին Հայաստանի ճարտարապետաշինարարարական համալսարան: Այստեղ նրանց դիմավորեց համալսարանի անվտանգության ծառայության պետը և նշեց, որ իրենք չեն խոչընդոտում ուսանողների իրազեկման ակցիային, բայց թույլ չեն տա խանգարել դասապրոցեսը:
Ճարտարապետաշինարարական համալսարանի ուսխորհրդի նախագահ Հովսեփ Հովեյանը լրագրողների հետ զրույցում նշեց, որ իրենք աջակցում են ուսանողներին, բայց դեմ են պայքարի այս ձևաչափին: Նրանք կողմնակիցն են քննարկումների ձևաչափին: 
12.22
Ուսանողները երթով շարժվեցին դեպի Երևանի պետական համալսարանի «Սև շենք» կոչվող մասնաճյուղ:
Այստեղ նրանք նույն առաջարկով հանդես եկան ուսանողներին ու պրոֆեսորադասախոսական կազմին դուրս գալ իրենց հետ բանավեճի և բերել հակափաստարկներ, թե ինչու են կողմ տարկետման իրավունքը սահմանափակող օրինագծին:
Բայց այստեղ ևս ուսանողների առաջարկին արձագանքող չեղավ: Նրանք հաստատեցին իրենց մոտեցումը, որ իրենք են մեծամասնություն կազմում, և ոչ թե այս օրինագծին կողմ արտահայտվողները:
Ուսանողները շարժվեցին դեպի այլ բուհեր:

11.20
Ուսանողները նոր նախաձեռնություն սկսեցին, որով բանավեճի հրավիրեցին առաջինը՝ Կենսաբանության ֆակուլտետի պրոֆեսորադասախոսական կազմին և ուսանողներին, իրենց խոսքով այն մեծամասնությանը, որը իբրև թե կողմ է օրինագծին:
Մի քանի րոպե սպասելուց հետո, ֆակուլտետից ուսանողների բանավեճի առաջարկին արձագանքող չեղավ։
Նրանք նույն առաջարկով շարժվեցին ԵՊՀ ռոմանոգերմանական ֆակուլտետի մասնաշենք:
Մեծամասնությանը բանավեճի հրավիրելու նպատակը ըստ ուսանողների, ապացուցելն է, որ ոչ թե իրենք են փոքրամասնություն կազմում, այլ նրանք, ովքեր կողմ են տարկետումը սահմանափակող օրինագծին: 
10.44
Ուսանողները ԵՊՀ գլխավոր մասնաշենքի մի քանի ֆակուլտետների դռների դիմաց թռուցիկներ են փակցրել՝ իրազեկելով դասադուլի ակցիայի մասին և կոչ անելով ուսանողներին միանալ իրենց:
«Հանուն գիտության զարգացման» նախաձեռնության անդամ Դավիթ Պետրոսյանը նշեց, որ ԵՊՀ գլխավոր մասնաշենքի մի քանի ֆակուլտետներով իրենց շրջայցի ընթացքում պարզել են, ուսանողների թիվը բավականի քիչ է, եղել են լսարաններ, որտեղ ընդհանրապես ուսանող չի եղել։
«Դա խոսում է այն մասին, որ խոսակցությունը, թե ուսանողների մեծամասնությունը կողմ է այս օրենքին, իրականությանը չի համապատասխանում: Դասադուլների մասնակիցների քանակը ուղիղ համեմատական չէ մեր աջակիցների քանակին, քանի որ դասապրոցեսի բոյկոտն ամեն մեկն իրականացնում է իր ձևով: Հենց նոր միացան մեզ Ճարտարագիտական համալսարանից՝ Պոլիտեխնիկից, միացումները շարունակվելու են»,-ասաց Դավիթ Պետրոսյանը:

10.25
Ուսանողների դասադուլի ակցիան այս պահին շարունակվում է ԵՊՀ գլխավոր մասնաշենքի մոտ: Քիչ հետ ուսանողները կսկսեն երթը համալսարանի տարբեր ֆակուլտետներով:
Ուսանողական շարժումը համակարգող «Հանուն գիտության զարգացման» նախաձեռնության անդամների խոսքով՝ իրենց պայքարը ուսանողների իրավունքների, կրթական ոլորտի բարեփոխումների համար է, իսկ առաջնային խնդիրը տարկետման իրավունքը սահմանափակող օրինագծի դեմ պայքարն է:
«Հանուն գիտության զարգացման» նախաձեռնության անդամ Դավիթ Պետրոսյանը ներկաներին ընթերցեց իրենց հայտարարությունը, որում մասնավորապես ասվում է. «Ուսանողական շարժման մասնակիցները դատապարտում են ԱԺ Պաշտպանության և անվտանգության հանձնաժողովի նոյեմբերի 10-ին՝ ամեն գնով նիստեր գումարելու ջանքերը, մթության քողի տակ նվազագույն քվորումով ու կասկածելի լեգիտիմությամբ նիստի հապճեպ անցկացումը, դրա ընթացքում հանրային լայն հնչեղություն ունեցող վիճահարույց օրինագծերի քննարկումն ու հապճեպ ընդունումը: Մենք գտնում ենք, որ նման վարքագիծը հարիր չէ խորհրդարանական հանրապետության խորհրդարանի հանձնաժողովին»:

10.07
Տարկետման իրավունքի սահմանափակման դեմ դասադուլ հայտարարած ուսանողներն այսօր առավոտից նորից ԵՊՀ-ում են: Հանրահավաքն ու երթը դեռևս չի սկսվել, սակայն արդեն իսկ բավական շատ մարդ է հավաքվել։
Հիշեցնենք, որ ուրբաթ երեկոյան ուսանողները հավաքվել էին Ազգային ժողովի մոտ, նրանք պահանջում էին ներկա լինել Զինվորական ծառայության և զինծառայողի կարգավիճակի մասին օրենքի համար գլխադասային՝ Ազգային անվտանգության, պաշտպանության և ներքին հարցերի հանձնաժողովի նիստին, սակայն նիստը հետաձգվեց քվորում չլինելու պատճառով:
Դրանից հետո ուշ երեկոյան հրավիրվեց արտահերթ նիստ և նախագիծը, դրական եզրակացությամբ, ուղարկվեց ԱԺ առաջիկա քառօրյայի օրակարգ: ՊՆ փոխնախարար Արտակ Զաքարյանը հայտարարեց, որ օրենքի նախագծում արվել են որոշակի զիջումներ, մասնավորապես բացառիկ տաղանդավոր ուսանողները կազատվեն զինծառայությունից:










