Հայաստանն ընդգրկվել է երկրների շարքում, որտեղ ահաբեկչության վտանգը մեծ չէ

10:11 • 16.11.17

Էկոնոմիկայի և խաղաղության ինստիտուտը (Institute for Economics and Peace) հրապարակել է «Ահաբեկչության համաշխարհային ինդեքս-2017»-ը, որում Հայաստանը 163 երկրների մեջ զբաղեցնում է 75-րդ տեղը՝ ընդգրկվելով երկրների շարքում, որտեղ ահաբեկչության վտանգը մեծ չէ:


Հայաստանում ահաբեկչության վտանգը առավելագույն 10 միավորից գնահատվել է 2,374 միավոր: 2016 թվականին Հայաստանի ահաբեկչության վտանգը գնահատվել է 2,086 միավոր: Նախորդ տարվա հետազոտությունում Հայաստանը զբաղեցրել է 108-րդ հորիզոնականը:


Ինդեքսում այս տարի Վրաստանը զբաղեցրել է 77-րդ տեղը, Ադրբեջանը՝ 95-րդ տեղը, Իրանը՝ 53-րդ տեղը, Թուրքիան՝ 9-րդ տեղը, Ռուսաստանը՝ 33-րդ տեղը:


Ահաբեկչության համար ամենավտանգավոր երկրներն են ճանաչվել Իրաքը, Աֆղանստանը, Նիգերիան, Սիրիան, Պակիստանը, Եմենը, Սոմալին, Հնդկաստանը, Թուրքիան և Լիբիան:


Համաձայն հրապարակված տվյալների՝ անցած տարի ահաբեկիչների գործողությունների հետևանքով աշխարհի 77 երկրներում զոհվել է 25 հազար 673 մարդ, ինչը 13 տոկոսով քիչ է, քան 2015 թվականին և 22 տոկոսով քիչ, քան 2014 թվականին: Ինչպես նշում է ինստիտուտն իր ամենամյա հետազոտությունում, աշխարհում ահաբեկչությունների զոհերի թիվը կրճատվում է երկրորդ տարին անընդմեջ:


«Իսլամական պետություն» ահաբեկչական խմբավորումը կրում է ավելի քան 9,1 հազար մարդու մահվան պատասխանատվություն, ինչը 50 տոկոսով ավելին է, քան 2015 թվականին:


Չնայած դրական միտման պահպանմանը՝ 2016 թվականը դեռևս մնում է զոհերի թվով երրորդ տարին 2000 թվականից ի վեր, երբ ինստիտուտը սկսել է կազմել ինդեքսը: Հետազոտության մեկ այլ բացասական եզրակացությունը այն երկրների թվի աճն է, որտեղ անցած տարի տեղի է ունեցել թեկուզ մեկ ահաբեկչություն:  


Ինչպես և անցած տարիներին, հետազոտությունը հաշվի է առնում յուրաքանչյուր երկրում տարվա ընթացքում ահաբեկչությունների, զոհերի և տուժածների թիվը, ինչպես նաև ավերածությունների ծավալը: Ընդհանուր միավորը շնորհվում է վերջին հինգ տարիներին միջին ցուցանիշի հիման վրա: