Վանում հայկական գերեզմանոցի տարածքում կառուցված հասարակական զուգարանը կապամոնտաժվի
Վանում հայկական գերեզմանոցի տարածքում կառուցված հասարակական զուգարանը մոտ ժամանակները կապամոնտաժվի, այս մասին հայտարարել է Թուրքիայի մշակույթի և զբոսաշրջության նախարար Նուման Քուրթուլմուշը, գրում է Sputnik-ի թուրքական ծառայությունը:
Քուրթուլմուշն այդ մասին հայտարարել է երկրի խորհրդարանում կայացած նիստերից մեկի ժամանակ՝ ի պատասխան Ժողովրդադեմոկրատական կուսակցության հայազգի պատգամավոր Կարո Փայլանի հարցմանն առ այն, թե իշխանություններն ինչ քայլեր են ձեռնարկել տվյալ հարցի առնչությամբ:
Թուրք նախարարը շեշտել է, որ ապամոնտաժման աշխատանքները կիրականացվեն առաջիկա 60 օրվա ընթացքում:
«Համապատասխան որոշումն ընդունված է, մենք հետևողական կլինենք այս թեմայի հարցում»,- ասել է Քուրթուլմուշը:
Հիշեցնենք, որ ամիսներ առաջ հայտնի էր դարձել, որ այժմյան Թուրքիայի տարածքում գտնվող Վանա լճի մոտ տեղական իշխանությունները լողափի այցելուների համար նախատեսված հանդերձարանն ու հանրային զուգարանը կառուցել են հենց հայկական գերեզմանատան տարածքում:
Նշվում է, որ շինարարական աշխատանքների հետևանքով քանդված հայկական գերեզմաններում եղած ոսկորները տարածվել են լճափին:
Հայտնի է նաև, որ բուլդոզերներն այդտեղից դուրս են բերել ուրարտական շրջանի գերեզմանաքար:










