Քաղաքացիների կողմից հանրաքվե անցկացնելու իրավունքը ուժի մեջ է մտնում նորընտիր ՀՀ նախագահի կողմից՝ իր պաշտոնի ստանձնման օրը. ԿԸՀ նախագահ

11:48 • 20.11.17

ՀՀ ԿԸՀ նախագահ Տիգրան Մուկուչյանը լրագրողների հետ զրույցում պնդեց, թե ԱԻՄ առաջնորդ Պարույր Հայրիկյանը հանրաքվե անցկացնելու գործընթաց այսօր չի կարող իրականացնել

«Շատ հստակ նշվում է, որ նշյալ 15-րդ գլխի իրավադրույթները, որտեղ նաև ամրագրված  է քաղաքացիական նախաձեռնության կարգով հանրաքվե անցկացնելու նախաձեռնության իրավունքի իրականցումը, ուժի մեջ է մտնում նորընտիր ՀՀ նախագահի կողմից՝ իր պաշտոնի ստանձնման օրը, իսկ մինչ այդ շարունակում են գործել 2005 թ-ի Սահմանադրության դրույթները»,-ասաց նա և հավելեց, թե գործող դրույթներով սահմանադրական նորմերն են՝ Սահմանադրություն ընդունվում  կամ դրանում փոփոխություն կատարվում են հանրաքվեի միջոցով` ՀՀ նախագահի կամ ԱԺ նախաձեռնությամբ:     

«Խնդիրը հետևյալն է՝ համաձայն Սահմանադրության իրավանորմերի, որտեղ սահմանված է  քաղաքացիների կողմից նախաձեռնություն անցկացնելու իրավունք, հստակ է նշված, թե այդ իրավանորմը որ ժամանակային պահից է սկսելու գործել»,-ասաց նա:

Ինչ վերաբերում է ստորագրահավաք անցկացնելու նախաձեռնությանը, ապա Տիգրան Մուկուչյանը նշեց, որ, իհարկե, հանրաքվեի մասին սահմանդրական օրենսդրական մանրամասն կանոնադրություններն ամրագրված են, բայց թե երբ կլինի համապատասխան օրենքը, դրա համար դեռ ժամանակ կա:    

«Երբ կլինի օրենքը՝ հստակ իրավադրույթներ կլինեն, թե ինչ կարգով քաղաքացիները պետք  է իրականացնեն իրենց նախաձեռնության իրավունքը և այսօր որևէ մեկը չի կարող ասել դա ստորագրահավաքի միջոցով է, թե այլ եղանակով կարող են այդ 200 000 քաղաքացիները իրականացնել»,-ասաց նա:  

ԿԸՀ նախագահը նշեց, որ Հայրիկյանին տվել են պատասխան, որը միանշանակ համահունչ է եղել այն դիմումին, որը ներկայացվել է ԿԸՀ:

«Հնչում է տեսակետ, թե այսօր հնարավոր է հանրաքվե անցկացնելու գործընթաց սկսել ՝ նկատի ունենալով, որ դա իրենց իրավունքի իրացումն է:

«Բայց եթե դա պաշտոնապես նախաձեռնվում է մեկնարկել, նախ և առաջ պետք է իրավունքը լինի, որ մեկնարկի, եթե չկա, որևէ մեկնարկի մասին խոսք լինել չի կարող: Եթե կլինի օրենքը, կլինի իրավունքի իրացման ամբողջական մեխանիզմը, այդ ժամանակ յուրաքանչյուր ոք, ով ցանկանա իր Սահմանադրության իրավունքից օգտվել՝ կարող է օգտվել»,-ասաց նա և Հայրիկյանին հուշեց՝ իրավական ճանապարհը մեկն է, եթե իրենց պատասխանի մեջ կա անհամաձայնություն, կարող են վիճարկել համապատասխան կարգով: