Ղրղզստանի նախագահի պաշտոնից հեռացող Ատամբաևը բոլորից ներողություն է խնդրել
Ղրղզստանի նախագահի պաշտոնից հեռացող Ալմազբեկ Ատամբաևը իր պաշտոնավարման եզրափակիչ մամուլի ասուլիսում ներողություն է խնդրել բոլորից, ում վիրավորել է: Այդ մասին հաղորդում է «ՌԻԱ Նովոստի»-ն:
Ղրղզստանի նոր նախագահական ընտրություններն անցկացվել են հոկտեմբերի 15-ին: Նորընտիր նախագահի՝ Սոորոնբայ Ժեենբեկովի երդմնակալության արարողությունը կայանալու է նոյեմբերի 25-ին:
«Հարգելի լրագրողներ, եթե ես կտրուկ էի, ապա ոչ միայն ձեզ հետ: Ես երբեմն չափազանց կտրուկ եմ խոսում: Եթե մեկին վիրավորել եմ, անգամ եթե ես ճիշտ էի, միևնույն է՝ ներողություն եմ խնդրում»,- ասել է Ատամբաևը: Նա հույս է հայտնել, որ հաջորդ նախագահն ավելի դիվանագետ կլինի:
«Ես կարծում եմ, որ մեր հաջորդ նախագահներն ավելի դիվանագետ կլինեն: Շատ ծանր էին այս վեց տարիները, նյարդերը երկաթից չեն»,- նշել է նա՝ ընդգծելով, որ միշտ ասում է ճշմարտությունը և ոչ միայն լրագրողներին, այլև այլ պետությունների նախագահներին:
Հիշեցնենք, որ նոյեմբերի 9-ին երրորդ և վերջնական ընթերցմամբ ընդունել է եվրասիական տնտեսական ինտեգրման պայմաններում տնտեսական համագործակցության զարգացման մասին Ղազախստանի հետ համաձայնագրի չեղարկման մասին օրենքի նախագիծը:
Համաձայնագիրը չեղարկվել է Բիշքեքի և Աստանայի միջև դիվանագիտական սկանդալի ֆոնին, որը տեղի է ունեցել Ղրղզստանում հոկտեմբերին անցկացված նախագահական ընտրություններից առաջ:
Ղրղզստանի և Ղազախստանի միջև հարաբերությունները վատթարացել են Ղրղզստանում նախագահական ընտրությունների ընթացքում, երբ տեղի է ունեցել դիվանագիտական սկանդալ՝ ընդդիմությունից Ղրղզստանի նախագահի թեկնածու Օմուրբեկ Բաբանովի հետ Նուրսուլթան Նազարբաևի հանդիպման պատճառով: Նախկին նախագահ Ալմազբեկ Աթամբաևը հայտարարել էր, որ դրանով Ղազախստանը միջամտում է Ղրղզստանի ներքին գործերին։
ԵԱՏՄ անդամ Ղրղզստանի և Ղազախստանի սահմանին իրավիճակը սրվել է հոկտեմբերի 10-ին, երբ Ղազախստանի իշխանություններն ուժեղացրել են անցակետերում հսկողությունը: Արդյունքում Ղրղզստանի կողմից կուտակվել են մեծ քանակությամբ մարդիկ և բեռնատարներ:
Ավելի ուշ Ատամբաևը հայտարարել է, որ հնարավոր է, սխալ է եղել, երբ «չափազանց էմոցիոնալ» կերպով է արտահայտվել Ղազախստանի նախագահ Նուրսուլթան Նազարբաևի հասցեին:










