Մոլդովայում ՌԴ դեսպանատունը դատապարտել է Ֆալեշտի քաղաքում Պուշկինի արձանի պղծումը
Մոլդովայի Ֆալեշտի քաղաքում վանդալները պղծել են ռուս գրող Ալեքսանդր Պուշկինի արձանը՝ կտրելով արձանի գլուխը և վնասելով ուսերը, այս մասին տեղեկացնում է korrespondent.net-ը:
Մոլդովայում Ռուսաստանի Դաշնության դեսպանատունը, արձագանքելով արձանի պղծման դեպքին, դատապարտել է այս քայլն ու նշել, որ այդ արձանը խորհրդանշում էր ռուս-մոլդովական երկարամյա բարեկամությունը:
Դեսպանատան պաշտոնական կայքում հրապարակված հայտարության մեջ Մոլդովայում ՌԴ դիվանագիտական ներկայացուցչությունն ընդգծում է, որ առայժմ անհասկանալի է մնում, թե ինչ դրդապատճառներով են հանցագործներն առաջնորդվել և արդյոք նրանց այս քայլին մղել է մոլդովական որոշ քաղաքական շրջանակներում տարածված հակառուսական տրամադրություններ կրող անձանց հաճոյանալու ցանկությունը:
Նշենք, որ տեղի ոստիկանությունը աշխատում է հանցագործներին գտնելու ուղղությամբ, դեպքի առնչությամբ հարուցված է քրեական գործ:










