ՊՊԾ գունդը զավթելու մեջ մեղադրվող Վարդգես Գևորգյանը կմնա կալանքի տակ. պաշտպանի միջնորդությունը մերժվեց
Ավան և Նոր-Նորք վարչական շրջանների ընդհանուր իրավասության դատարանում ընթանում է ոստիկանության ՊՊԾ գունդը զավթելու մեջ մեղադրվող անձանցից 11-ի գործով քննությունը, որը գտնվում Արտուշ Գաբրիելյանի վարույթում:
Դատական նիստի ընթացքում ամբաստանյալ Վարդգես Գևորգյանի պաշտպան Մեժլումյանը միջնորդություն ներկայացրեց իր պաշտպանյալի նկատմամբ կիրառվող խափանման միջոց կալանքը փոխելու վերաբերյալ:
Պաշտպանն ասաց, որ Վարդգես Գևորգյանի խափանման միջոցին անդրադառնալիս դատարանը որևէ կերպ մասնակից չի դարձրել պաշտպանական կողմին ինչով անտեսել է նաև խափանման միջոցի վերաբերյալ պաշտպանական կողմի դիրքորոշումն ու կարծիք հայտնելու իրավունքը:
«Փաստորեն կալանավորումը առանց ժամկետի անփոփոխ թողնելը հանգեցրել է անորոշ ժամանակով կալանավորման, հարկ է նշել, որ դատարանի վերը նշված որոշումները չեն համարվում պատճառաբանված:
Նշեմ նաև, որ դատարանը պետք է հարգանք ցուցաբերի անմեղության կանխավարկածի նկատմամբ և պատճառաբանված որոշման մեջ հիմնավորի գրավի կիրառման կողմ և դեմ փաստարկները»,-ասաց պաշտպանը:
Նա կալանքը որպես խափանման միջոց վերացնելու և նրան կալանքից ազատելու մասին միջնորդություն ներկայացրեց, նշելով.«Կամ եթե, այնուամենայնիվ, դատարանը կալանավորումը կգտնի հիմնավոր, ապա միջնորդում եմ կալանքը փոխարինել գրավով»:
Պաշտպանական կողմը միացավ միջնորդությանը, իսկ մեղադրող կողմն առարկեց.«Դատարանի կողմից բազմաթիվ անգամ հիմնավորվել է կալանավորման և գրավ չկիրառելու հիմքերը: Այդ հիմքերը հիմա էլ կան, խնդրում եմ միջնորդությունը մերժել»:
Նախքան դատարանի խորհրդակցական սենյակ գնալը, ամբաստանյալ Գևորգյանն անդրադարձավ իրեն առաջադրված մեղադրանքներից թմրամիջոցների կամ հոգեմետ նյութերի ապօրինի շրջանառությանը և ասաց.«Ինչ վերաբերում է նարկոտիկ կոչեցյալին, ես դրա համար անալիզներ եմ տվել ու իմ վրա ոչ մի հետք չի եղել: Խնդրում եմ այդ մասն անջատել իմ քրեական գործից»:
Արտուշ Գաբրիելյանն ասաց, որ դատաքննության ընթացքում այդ հարցին կանդրադառնան: Դատարանը գնաց խորհրդակցական սենյակ և վերադառնալուց հետո հայտնեց միջնորդությունը մերժելու մասին:
Հիշեցնենք, որ Վարդգես Գևորգյանին մեղադրանք է առաջադրվել ՀՀ ՔՕ-ի 34-218-րդ հոդվածի 3-րդ մասի 1-ին կետի, 34-219-րդ հոդվածի 3-րդ մասի 1-ին կետի, 34-235-րդ հոդվածի 3-րդ մասի, 235-րդ հոդվածի 1-ին մասի, 4-րդ մասի, 238-րդ հոդվածի 3-րդ մասի 2-րդ կետի, 365-րդ հոդվածի 1-ին մասի և 268-րդ հոդվածի 1-ին մասի հատկանիշներով:










