ԵՄ-ի հետ Բելառուսի նոր համաձայնագիրը կլինի ավելի շուտ, քան թե ավելի ուշ. Բելառուսի ԱԳ նախարար
Բելառուսի արտգործնախարար Վլադիմիր Մակեյը վստահություն է հայտնել ԵՄ-ի հետ մոտ ժամանակներս Բելառուսի համագործակցության մասին համաձայնագրի կնքման դրական հեռանկարի առնչությամբ:
Այդ մասին նա հայտարարել է լրագրողներին՝ ժամանելով Բրյուսելում «Արևելյան գործընկերության» գագաթնաժողովին, հայտնում է «Բելտա» գործակալությունը:
«Ես վստահ եմ, որ դա կլինի (նոր համաձայնագիրը) և որ դա կլինի ավելի շուտ, քան թե ավելի ուշ: Մենք աշխատում ենք մեր եվրոպացի գործընկերների հետ»,- ասել է նախարարը:
Նշենք, որ այսօր՝ նոյեմբերի 24-ին, Բրյուսելում մեկնարկում է Արևելյան գործընկերության (ԱլԳ) 5-րդ գագաթնաժողովը։
Գագաթնաժողովի ընթացքում Եվրամիության անդամ պետությունների ու Արևելյան գործընկեր վեց երկրների կամ նրանց կառավարությունների ղեկավարները կուղենշեն ապագա համագործակցությունը: Նրանք նաև ի մի կբերեն վերջին՝ 2015թ. Ռիգայի գագաթաժողովից հետո եղած ձեռքբերումները՝ կենտրոնանալով Արևելյան գործընկեր վեց երկրների քաղաքացիների համար ապահովված շոշափելի արդյունքների վրա:
Նշենք, որ ԱլԳ գագաթնաժողովին մասնակցելու համար Բելգիա է մեկնել Հայաստանի Հանրապետության Նախագահ Սերժ Սարգսյանը: Նախատեսվում է, որ գագաթնաժողովի ընթացքում պետք է ստորագրվի Հայաստանի և Եվրամիության միջև Համապարփակ և ընդլայնված գործընկերության իրավական շրջանակային նոր համաձայնագիրը, որի շուրջ բանակցությունները տևել են երկու տարի։ Այն նախաստորագրվել էր այս տարվա մարտին:










