ԱլԳ գագաթնաժողովին Լուկաշենկոյի բացակայությունը Կրեմլի որոշումն է. Լիտվայի նախագահ

14:51 • 24.11.17

Լիտվայի նախագահ Դալյա Գրիբաուսկայտեն հայտարարել է, որ այն, որ այսօր Բելառուսի նախագահ Ալեքսանդր Լուկաշենկոն ներկա չի լինի Բրյուսելում Արևելյան գործընկերության գագաթնաժողովին, Կրեմլի որոշումն է, հայտնում է Delfi-ն:


«Ես կարծում եմ, որ դա ցուցադրում է այն, ինչ ցույց տվեցին զորավարժությունները, իր տարածքում տերը Մոսկվան է, այլ ոչ Բելառուսը, ոչ Մինսկը: Եվ որոշումները, թե ով ուր մեկնի, կայացնում է Մոսկվան, այլ ոչ Մինսկը»,- LRT-ին տված հարցազրույցում ասել է Գրիբաուսկայտեն:


Հիշեցնենք, որ ավելի վաղ հայտնի է դարձել, որ Բելառուսի նախագահ Ալեքսանդր Լուկաշենկոն չի մեկնի Բրյուսելում ընթացող Արևելյան գործընկերության գագաթնաժողովին: Ինչպես հայտնել են Բելառուսի ԱԳՆ-ում, գագաթնաժողովին Լուկաշենկոյի մասնակցության անհրաժեշտություն չկա, քանի որ երկիրը չի ձգտում միանալ Եվրամիությանը: Գագաթնաժողովին երկիրը ներկայացնում է Բելառուսի արտգործնախարար Վլադիմիր Մակեյը, չնայած նրան, որ հրավերն ուղարկվել է Լուկաշենկոյի անունով: