Այսօր կստորագրվի Հայաստանի հետ նոր Համապարփակ և ընդլայնված գործընկերության համաձայնագիրը. Եվրախորհրդարանի նախագահ

Այսօր կստորագրվի Հայաստանի հետ նոր Համապարփակ և ընդլայնված գործընկերության համաձայնագիրը, հայտարարել է Եվրախորհրդարանի նախագահ Անտոնիո Տայանին «Արևելյան գործընկերության» գագաթնաժողովում ունեցած իր ելույթում:

Տայանին նշել է, որ երկու տարի առաջ Ռիգայում կայացած վերջին գագաթնաժողովի արդյունքները «պետք է հուշեն նոր հավատով և լավատեսությամբ մտածել այս կարևոր գործընկերությունն ուժեղացնելու համար հետագա քայլերի ուղղությամբ»:

«Երկու խոսքով՝ մենք ընթանում ենք ճիշտ ուղղությամբ. ուժի մեջ է մտել երեք նոր ասոցացման համաձայնագիր՝ Վրաստանի, Մոլդովայի և Ուկրաինայի հետ, սահմանվել է երկու նոր առանց վիզայի ռեժիմ՝ Վրաստանի և Ուկրաինայի հետ, այսօր կստորագրվի Հայաստանի հետ նոր Համապարփակ և ընդլայնված գործընկերության համաձայնագիրը՝ հետևելով Մոլդովայի հետ արդեն ստորագրված համաձայնագրին, մենք սկսել ենք Ադրբեջանի հետ նոր համաձայնագրի շուրջ բանակցությունները, և վերջում, մենք նախաձեռնել ենք Բելառուսի հետ քննադատական ներգրավվածության քաղաքականություն՝ նախևառաջ երկրի քաղաքացիների և քաղաքացիական հասարակության շահերը պաշտպանելու նպատակով»,- ասել է Եվրախորհրդարանի նախագահը:

Նրա խոսքերով՝ այս բոլոր ձեռքբերումները «հիանալի հիմք են տալիս այսօր գագաթնաժողովի ընթացքում քննարկումների համար և պետք է նաև խրախուսեն ավելի հավակնոտ մոտեցում ընդունել ապագա համագործակցության վերաբերյալ»:

Եվրախորհրդարանի նախագահ Անտոնիո Տայանին հայտարարել է, որ Եվրամիությունը պետք է հստակ դիրքորոշում ստանձնի «Արևելյան գործընկերության» քաղաքական ապագայի առնչությամբ:

«Եկել է մեզ համար «Արևելյան գործընկերության» ապագայի հստակ քաղաքական տեսլական ունենալու ժամանակը՝ հիմնվելով ժողովրդավարական բազմազանության հիմնարար արժեքների, մարդու իրավունքների և հիմնարար ազատությունների, իրավունքի գերակայության և առողջ կառավարման, կոռուպցիայի և դեմ պայքարի, թափանցիկության, ինչպես նաև քաղաքացիական հասարակության ամրապնդման վրա»,- հայտարարել է Տայանին՝ ելույթ ունենալով «Արևելյան գործընկերության» գագաթնաժողովում:

Նրա խոսքերով՝ այդ ուղղությամբ վերջին ձեռքբերումները «Արևելյան գործընկերության» ապագայի վերաբերյալ նոր և լեգիտիմ սպասումներ» են ծնում:

«Չափազանց կարևոր է երաշխավորել, որ այդ ընդհանուր քաղաքականությունը բերի կոնկրետ շահեր «Արևելյան գործընկերության» և ԵՄ-ի երկրների յուրաքանչյուր քաղաքացու համար»,- ասել է Եվրախորհրդարանի նախագահը:

Ինչպես ավելի վաղ հայտնել էր Tert.am-ը, Բրյուսելում մեկնարկել է ԵՄ Արևելյան գործընկերության գագաթնաժողովը, որի մասնակիցներին նիստի մեկնարկից առաջ ողջունել են ԵԽ նախագահ Դոնալդ Տուսկը, Եվրոպական հանձնաժողովի նախագահ Ժան-Կլոդ Յունկերը և ԵՄ խորհրդի նախագահող երկրի` Էստոնիայի վարչապետ Յուրի Ռատասը: Գագաթնաժողովին մասնակցում է նաև Նախագահ Սերժ Սարգսյանը:

Հիշեցնենք, որ ԵՄ-ն սահմանել է ԱլԳ 20 առանցքային արդյունքներ 2020թ. համար, ընդ որում՝ հիմնական ուղենիշները պետք է հստակեցվեն Բրյուսելի գագաթաժողովի ընթացքում:

Նախատեսվում է, որ գագաթնաժողովի ընթացքում պետք է ստորագրվի Հայաստանի և Եվրամիության միջև Համապարփակ և ընդլայնված գործընկերության իրավական շրջանակային նոր համաձայնագիրը, որի շուրջ բանակցությունները տևել են երկու տարի։ Այն նախաստորագրվել էր այս տարվա մարտին:

Նախաստորագրված համաձայնագրի տեքստի հրապարակումից հետո՝ փորձագիտական շրջանակների կողմից փաստաթուղթը բավականին լավ ընդունվեց: Ընդհանրական կարծիքը հետևյալն էր՝ թեև այն զիջում է Ասոցացման համաձայնագրին, այնուամենայնիվ բավականին լուրջ բարեփոխումների սկիզբ է դնելու Հայաստանում։