Բաքուն չի ընդունել ՌԴ նոր դեսպանի թեկնածությունը՝ նրա հայամետ դիրքորոշման պատճառով. ադրբեջանական լրատվամիջոցներ

10:30 • 28.11.17

Ռուսաստանի ԱԳՆ-ն չի ստացել Ադրբեջանի համաձայնությունը Գեորգի Զուևին այդ երկրում ՌԴ նոր դեսպան նշանակելու առնչությամբ: Այդ մասին հայտնում են ադրբեջանական լրատվամիջոցները՝ վկայակոչելով Ռուսաստանի ԱԳՆ-ում աղբյուրների:


Համաձայն դիվանագիտական հարաբերությունների կանոնների՝ դեսպանի նշանակումից առաջ ընդունող կողմը տալիս է իր համաձայնությունը հավատարմագրերի հանձնման համար:


Ինչպես հայտնի է դարձել, Ադրբեջանը հրաժարվել է տալ Գեորգի Զուևին դեսպան նշանակելու նախնական համաձայնությունը՝ նրա «վառ արտահայտված հայամետ դիրքորոշման» պատճառով:


Ավելի վաղ հայտնի էր դարձել, որ Ռուսաստանի նախագահ Վլադիմիր Պուտինը նախօրեին հետ է կանչել Ադրբեջանում Ռուսաստանի դեսպան Վլադիմիր Դորոխինին:


Որպես Ադրբեջանում Ռուսաստանի դեսպան Գեորգի Զուևի թեկնածությունն արդեն հաստատվել էր ՌԴ պետդումայի ԱՊՀ հարցերով հանձնաժողովի կողմից: