Հոնդուրասում անկարգությունների ֆոնին կասեցվել է քաղաքացիների իրավունքների պաշտպանության սահմանադրական երաշխիքների գործողությունը

10:52 • 02.12.17

Հոնդուրասում նախագահական ընտրություններից հետո սկսված անկարգությունների ֆոնին Նախարարների խորհրդի որոշմամբ կասեցվել է քաղաքացիների իրավունքների պաշտպանության սահմանադրական երաշխիքների գործողությունը, հայտնում է «ՌԻԱ Նովոստի» գործակալությունը՝ Prensa պորտալին հղումով։


Իշխանությունները նաև պարետային ժամ են սահմանել, որը կգործի տասն օր՝ ժամը 18.00-ից մինչև առավոտյան ժամը 6.00-ն։


Նախարարների խորհրդի քարտուղար Էբալ Դիասը հայտնել է, որ սահմանափակումներն ուժի մեջ են մտնում ուրբաթ՝ ժամը 23.00-ից (երևանյան ժամանակով շաբաթ՝ առավոտյան 9-ից)։


Երկրի գերագույն ընտրական դատարանի վերջին տվյալների համաձայն՝ քվեաթերթիկկների 94,35%-ի հաշվարկից հետո առաջատարն է գործող նախագահ Խուան Օռլանդո Էրնանդեսը՝ 42,92% ձայնով։ Ընդդիմությունից նրա մրցակից Սալվադոր Նասրալան դեռ հավաքել է 41,42% ձայն։ Արդյունքների հայտարարումից հետո Նասրալայի աջակիցները դուրս են եկել փողոցներ՝ պահանջելով ընտրությունների վերջնական արդյունքների հրապարակում, սակայն բողոքի ակցիաները վերաճել են անկարգությունների, ինչի հետևանքով ձերբակալվել է առնվազն 100 մարդ, 1 մարդ սպանվել է, 20-ը՝ վիրավորվել։


Ավելի վաղ հաղորդվել էր, որ ընտրությունների վերջնական արդյունքները կհրապարակվեն ուրբաթ երեկոյան, սակայն ավելի ուշ նշվել է, որ հաշվարկը շարունակվում է, և արդյունքները կհրապարակվեն շաբաթ։