«Որոնում և փրկություն». Արգենտինայում անհետացած «Սան Խուան» սուզանավի անձնակազմի հարազատները քայլերթ են անցկացրել
Արգենտինայի ռազմածովային ուժերի «Սան Խուան» սուզանավի անձնակազմի հարազատներն ու ընկերները՝ մոտ 300 մարդ, քայլերթ են կազմակերպել Մար դել Պլատա քաղաքում՝ պահանջելով փրկել ծովագնացներին ու երկրի նախագահ Մաուրիսիո Մակրիի ներկայությունը, հայտնում է «ՌԻԱ Նովոստի» գործակալությունը՝ La Gaceta թերթին հղումով։
Ըստ թերթի՝ քայլերթը սկսվել է կիրակի առավոտյան երկրի ռազմածովային ուժերի բազայի դարպասների մոտից ու ձգվել մոտ 7 կմ։ Քայլերթի մասնակիցները բացականչել են՝ «Որոնում և փրկություն», «Մենք ցանկանում ենք պատասխան ստանալ», «Հույս և հավատ», «Մի՛ մոռացեք «Սան Խուան» սուզանավի մասին»։
«Նախագահ Մակրին պետք է լինի այստեղ, որովհետև սա է առաջնահերթը, և ոչ G20-ը, այս ամբողջ իրավիճակի հետևում կանգնած է 44 ընտանիք, և ինչ որ մեկը պետք է ստանձնի այս ամենի պատասխանատվությունը»,- ասել է կորած ծովագնացներից մեկի կինը։
Ավելի վաղ Արգենտինայի ռազմածովային ուժերի ներկայացուցիչն ասել էր, որ մասնագետներն անհետացած «Սան Խուան»-ի գտնվելու երկու հնարավոր վայր են որոշել՝ 700 և 950 մետր խորությունների վրա։
Հիշեցնենք, որ սուզանավի հետ կապը կորել էր նոյեմբերի 15-ից: Հաստատված վերջին կապի ժամանակ «Սան Խուան»-ից հայտնել էին վթարի մասին: Դրանից հետո սկսել է շրջանառվել այն վարկածը, որ սուզանավում կարող էր պայթյուն տեղի ունեցած լինել: Արգենտինայի իշխանությունները որոշել են դադարեցնել նոյեմբերի 15-ին անհետացած «Սան Խուան»-ի 44 հոգանոց անձնակազմի որոնողափրկարարական աշխատանքները:
«Փրկվածներ չեն լինի»,-ասել էր երկրի ռազմածովային ուժերի պաշտոնական ներկայացուցիչ Էնրիկե Բալբին։










