Ծնողները սպասում են, որ ԿԳՆ և ՄԻՊ գրասենյակից անպայման արձագանքեն. Գ. Համբարյանը՝ ՇՊՀ-ից 7 ուսանողների հեռացման նոր զարգացումների մասին
Շիրակի պետական համալսարանի դասախոս, քաղաքագետ Գագիկ Համբարյանն ավելի վաղ ահազանգել էր, որ բուհի ռեկտոր Սահակ Մինասյանի միանձնյա որոշմամբ՝ նոյեմբերի 29-ին բուհից հեռացվել է 7 ուսանող՝ բոլորն էլ նախազորակոչային պատրաստություն բաժնից:
Tert.am-ի հետ զրույցում Գագիկ Համբարյանը տեղեկացրեց, որ հեռացված ուսանողներն ու նրանց ծնողները բաց նամակով դիմել են ՀՀ կրթության և գիտության նախարարին ու Մարդու իրավունքների պաշտպանին:
«Հիմա սպասում ենք արձագանքի, որովհետև ըստ օրենքի՝ ԿԳՆ-ն 9 օրվա ընթացքում պետք է պատասխանի, իսկ ՄԻՊ-ի գրասենյակում էլ մեզ հավաստիացրին, որ Արման Թաթոյանը Հայաստան վերադառնալուց հետո ևս կարձագանքի այն ամենին, ինչ տեղի է ունենում Շիրակի պետական համալսարանում: Ծնողները, ասեմ, որ շատ վրդովված են տեղի ունեցածի կապակցությամբ և պահանջում են վերականգնել իրենց երեխաների օրինական իրավունքները»,-ասաց նա։
Համբարյանը վերահաստատեց մոտեցումը, ըստ որի՝ ուսանողները բուհից հեռացվել են օրենքի կոպտագույն խախտումով, և ինչպես բոլոր հայաստանյան բուհերում, ՇՊՀ-ում էլ ուսանողին հեռացնել կարող էին բացառապես մինչև սեպտեմբերի 20-ը, ինչն այս դեպքում արվել է նոյեմբերի 29-ին:
«Ամենազավեշտալին այն է, որ այդ 7 ուսանողներն էլ, ովքեր տարկետման իրավունք ունեն, փոխադրական են ստացել և երկու ամսից ավելի այցելել են, մասնակցել են դասերին, որոշները վարձավճար էլ են մուծել արդեն», -ասաց Համբարյանը:
Նա նաև նշեց, որ ՇՊՀ իր գործընկեր դասախոսներից նոր անհանգստացնող տեղեկություն է ստացել. «Դեկտեմբերի մեկին անհայտ անձինք մուտք են գործել նախազորակոչային պատրաստության բաժին և տարել են բոլոր մատյանները: Դեկտեմբերի 4-ին որոշ դասախոսներ, ովքեր դասավանդում են այդտեղ, պահանջել են մատյանները տալ, որպեսզի իրենք լրացնեն, ասել են՝ մատյանները տեղում չեն։ Հարց է առաջանում՝ ի՞նչ են փորձում թաքցնել որոշ մարդիկ և ո՞ւմ պատվերով են մատյանները դուրս բերվել ֆակուլտետից»։
Շիրակի պետական համալսարանի ռեկտոր Սահակ Մինասյանն ավելի վաղ Tert.am-ի հետ զրույցում նշել էր, որ ամեն բան արված է օրինականության սահմաններում. այլ պատասխան մինչ օրս, Գագիկ Համբարյանի խոսքով, ռեկտորից չեն ստացել:
«Ինքը պատասխանել է մեկ նախադասությամբ՝ ինչ արել եմ, օրինական եմ արել։ Բայց էլի եմ կրկնում՝ ոչ մի օրինականության մասին խոսք չկա՝ սկսած հեռացման ժամկետից: Ծնողները սպասում են, որ ԿԳՆ և ՄԻՊ գրասենյակից անպայման գան, հետաքրքրվեն, որ իրենք էլ տեսնեն՝ հետագայում ինչ են անելու, որովհետև այն, ինչ արել է ՇՊՀ ռեկտոր Սահակ Մինասյանը, ուղղակի հանցագործություն է: Այս ուսանողներն ու նրանց ծնողները հայտարարում են, որ դեմ չեն բանակում ծառայելուն, բայց դա պետք է լրիվ օրինական լինի»,-եզրափակեց Գագիկ Համբարյանը:










