Սաակաշվիլիի աջակիցները սպառնացել են գնալ գլխավոր դատախազի տուն՝ իրենց վրանային ճամբարի վրա նոր հարձակման դեպքում (տեսանյութ)
Վրաստանի նախկին նախագահ Միխեիլ Սաակաշվիլիի աջակիցները սպառնացել են գնալ Ուկրաինայի գլխավոր դատախազ Յուրի Լուցենկոյի տուն, եթե ուժայինները կրկին փորձեն հարձակվել վրանային ճամբարի վրա: Այդ մասին հայտարարել է Սաակաշվիլիի «Նոր ուժերի շարժում» կուսակցության առաջնորդներից մեկը՝ պատգամավոր Յուրի Դերևյանկոն, հայտնում է «ՌԻԱ Նովոստի»-ն:
«Հարգելի պարոն Լուցենկո, մարդիկ ինձ խնդրել են փոխանցել, որ եթե ևս մի անգամ թափվի Գերագույն ռադայի առաջ գտնվող խաղաղ ուկրաինացիների արյունը, բոլորը կգան ձեր տուն»,- ասել է Դերևյանկոն՝ ելույթ ունենալով խորհրդարանում:
Նա խնդրել է ուժայիններին «չսադրել մարդկանց»:
Այսօր առավոտյան իրավապահները Սաակաշվիլիին գտնելու համար այցելել են վրանային ճամբար, սակայն նրա աջակիցները դիմադրություն են ցույց տվել, և բախումներ են տեղի ունեցել: Ցուցարարների խոսքերով՝ վնասվածք է ստացել ութ ակտիվիստ:
Համացանցում հայտնվել է բախումների տեսանյութը:
Նշենք, որ Ուկրաինայի գլխավոր դատախազի մամուլի քարտուղար Լարիսա Սարգանը հայտնել է, որ Սաակաշվիլիի նկատմամբ հետախուզում է հայտարարվել երեք հոդվածով:
Հիշեցնենք, որ Ուկրաինայի անվտանգության ծառայության աշխատակիցները երեկ խուզարկում են իրականացրել և ձերբակալել են Միխեիլ Սաակաշվիլիին: Այնուամենայնիվ, Օդեսայի շրջանի նախկին նահանգապետի աջակիցները որոշ ժամանակ անց կոտրել են Անվտանգության ծառայությանը պատկանող միկրոավտոբուսի հետևի դուռն ու ազատել քաղաքական գործչին:










