Հորդանան գետի արևմտյան ափին պաղեստինցիների ու իսրայելական ուժերի միջև բախումներ են սկսվել. «ՌԻԱ Նովոստի» (ուղիղ միացում)

16:24 • 07.12.17

Հորդանան գետի արևմտյան ափի ու Գազայի հատվածի տարբեր մասերում բախումներ են սկսվել պաղեստինցիների ու իսրայելական ուժերի միջև, հայտնում է ria.ru-ն՝ Իսրայելի պաշտպանական բանակի ներկայացուցչին հղումով:

«Ընթանում են բախումներ: Այժմ փորձում ենք պարզել մանրամասները»,-ասել է աղբյուրը:

Պաղեստինյան Ռամալլահ քաղաքի բնակիչներից մեկը ria.ru-ի հետ զրույցում հայտնել է, որ քաղաքում ու Պաղեստինի մյուս տարածքներում համընդհանուր գործադուլ է անցկացվում: Իսրայելական հսկիչ-անցագրային կետերի մոտ կառուցվում են բարիկադներ, մարդիկ այրում են մեքենաների անիվները:

Աղբյուրը նշում է, որ համընդհանուր գործադուլի շրջանակում փակվել են դպրոցները, կրթական այլ հաստատություններ, խանութներ:

Պաղեստինյան իշխանությունները կոչ են արել քաղաքացիներին կազմակերպել բողոքի ակցիաներ, որպեսզի իրենց ձայնը հասնի միջազգային հանրությանը:

Հայտնի է, որ Իսրայելի պաշտպանության բանակը մի քանի լրացուցիչ գումարտակ, ինչպես նաև՝ հետախուզական և տարածքի պաշտպանության ստորաբաժանումներ է ուղարկում Հորդանան գետի արևմտյան ափ:

Ինչպես ավելի վաղ հայտնել էր Tert.am-ը, պաղեստինցիներն ի նշան Միացյալ Նահանգների նախագահ Դոնալդ Թրամփի կողմից Երուսաղեմը պաշտոնապես Իսրայելի մայրաքաղաք ճանաչելու որոշման դեմ բողոքի հանգցրել են քրիստոնյաների համար սրբազան համարվող Բեթղեհեմ քաղաքի Սուրբ Ծննդյան տաճարի մոտ տեղադրված տոնածառի լույսերը:

Հիշեցնենք, որ Թրամփն իր որոշման մասին հայտարարել է Սպիտակ տանը կայացած կարճատև ճեպազրույցի ժամանակ:

«Վստահ եմ, որ ժամանակն է Երուսաղեմը պաշտոնապես Իսրայելի մայրաքաղաք ճանաչել: Մինչ նախկին նախագահները միայն խոստումներ էին տալիս այս մասին, սակայն իրենց խոսքը չէին պահում, ես պատրաստ եմ դա անել: Երուսաղեմն Իսրայելի մայրաքաղաքն է: Այս փաստի ճանաչումը ոչ ավելին է, քան իրականության ընդունում»,-հայտարարել է Թրամփը:

Բազմաթիվ պետությունների ղեկավարներ շտապել են քննադատել այս որոշումը՝ նախազգուշացնելով, որ դա կսադրի Պաղեստինի հետ խաղաղ բանակցային գործընթացը:

Պաղեստինի ղեկավար Մահմուդ Աբասն ասել է, որ Թրամփի «ցավալի ու անընդունելի» որոշումն ուղղակիորեն վտանգի տակ է դնում խաղաղության հասնելուն ուղղված բոլոր ջանքերը:

«Այս որոշումը տարածաշրջանում «դժոխքի դռները» կբացի ԱՄՆ-ի համար»,-ասել է Պաղեստինում գործող «Համաս» շարժման ղեկավար Իսմայիլ Ռադվանը: