Մեղրու ազատ տնտեսական գոտում 130-150 մլն դոլարի ներդրում կիրականացվի, կբացվի 1500 աշխատատեղ. նախարար

19:12 • 07.12.17

Այսօր Կառավարության նիստի ընթացքում գործադիր մարմնի հավանությանն արժանացավ Սյունիքի մարզի Մեղրի համայնքում ազատ տնտեսական գոտի ստեղծելու նախագիծը, համաձայն որի՝ «Մեղրի ազատ տնտեսական գոտի» ՓԲԸ-ն ազատ տնտեսական գոտու կազմակերպիչ ճանաչվեց, և հաստատվեց կազմակերպչի կողմից ներկայացվող հաշվետվության ձևերը հաստատելու մասին նախագիծը:

Նախագիծը գործադիրի հավանությանը ներկայացնող Տնտեսական զարգացման և ներդրումների նախարար Սուրեն Կարայանն ասաց, որ ազատ տնտեսական գոտու նպատակն է օտարերկրյա ուղղակի ներդրումների ներգրավումը, արտահանման ուղղվածություն ունեցող գործունեության խթանումը:

Նրա խոսքով՝ ԱԳՏ-ի բացումը տեղի կունենա դեկտեմբերի 15-ին, իսկ գործունեության ժամկետը 50 տարի է:
 
«Առաջիկա տարիներին նախատեսվում է ներգրավել 50-70 շահագործող կազմակերպություն, որոնք կիրականացնեն 130-150 մլն դոլարի ներդրում, կստեղծվի շուրջ 1500 նոր աշխատատեղ, իսկ արտահանման ծավալները կկազմեն 350 մլն դոլար»,- ասաց նախարարը:

Նշենք, որ ընկերության 100% բաժնետոմսերի փաթեթը տնօրինվում է «Համահայկական ֆոնդ» փակ ոչ հրապարակային պայմանագրային ներդրումային ֆոնդի կողմից: