Գերմանիայում կոալիցիոն կառավարություն ձևավորելու շուրջ բանակցությունները կսկսվեն դեկտեմբերի 13-ին
Գերմանիայի սոցիալ-դեմոկրատական կուսակցության և Գերմանիայի քրիստոնեա-սոցիալական միություն/Քրիստոնեա-դեմոկրատական միություն դաշինքի միջև բանակցությունները կսկսվեն դեկտեմբերի 13-ին: Այս մասին հայտնում է Bild-ը:
ԳՍԴԿ-ի անդամները վերընտրել են Մարտին Շուլցին որպես առաջնորդ՝ տալով նրան ձայների 82 տոկոսը: Դրանից հետո կուսակցության անդամները քվեարկել են Գերմանիայի կանցլեր Անգելա Մերկելի ԳՔՍՄ/ԳՔԴՄ դաշինքի հետ բանակցություններ սկսելու և կոալիցիոն կառավարություն ձևավորելու օգտին:
Հիշեցնենք, որ Գերմանիայի կանցլեր Անգելա Մերկելին չի հաջողվել կոալիցիա կազմել, քանի որ Ազատ դեմոկրատական կուսակցությունը (ԱԴԿ) նոյեմբերի 19-ին դուրս է եկել բանակցային գործընթացից:
Այնուհետև ձախակողմյան ուժերը ներկայացնող «Այլընտրանք հանուն Գերմանիայի» կուսակցության առաջնորդներ Ալեքսանդր Հաուլանդն ու Ալիսա Վայդելը կոչ են արել երկրի կանցլեր Անգելա Մերկելին հրաժարական տալ, քանի որ նրան չի հաջողվել կոալիցիա կազմել 4 կուսակցությունների միջև:
Մեկնաբանելով այս իրադարձությունները՝ Գերմանիայի նախագահ Ֆրանկ-Վալտեր Շտայնմայերը բանակցությունների մասնակիցներին կոչ է արել վերանայել դիրքորոշումը՝ հայտնելով, որ Գերմանիան մի իրավիճակում է, որում չի եղել վերջին 70 տարում:
Մեկնաբանելով ձախողումը՝ Մերկելն ափսոսանք է հայտնել Ազատ դեմոկրատական կուսակցության դուրս գալու առնչությամբ՝ նկատելով, որ, այնուհանդերձ, կողմերին կհաջողվեր ընդհանուր հայտարարի գալ:










