ԱՄՆ պետքարտուղարությունը նախազգուշացում է տարածել օտար երկրներում գտնվող ԱՄՆ քաղաքացիների համար
ԱՄՆ պետքարտուղարությունը Երուսաղեմն Իսրայելի մայրաքաղաք ճանաչելու և ամերիկյան դեսպանատունն այնտեղ տեղափոխելու վերաբերյալ նախագահ Դոնալդ Թրամփի հայտարարությունից հետո ամբողջ աշխարհով մեկ «նախազգուշացում» է տարածել, հայտնում է «Ամերիկայի ձայնը»:
«Ամբողջ աշխարհով մեկ ամերիկյան պետական կառույցները բարձր զգոնության ռեժիմում են: Այս կառույցները կարող են ժամանակավորապես փակվել կամ պարբերաբար դադարեցնել հանրային ծառայություններն՝ իրենց անվտանգությունը գնահատելու համար: Այս դեպքերում ամերիկյան դեսպանատները և հյուպատոսարաններն ամեն ջանք կգործադրեն ԱՄՆ-ի քաղաքացիներին արտակարգ ծառայություններ տրամադրելու համար»,- ասված է հայտարարությունում:
ԱՄՆ պետքարտուղարությունը կոչ է արել ամերիկացի քաղաքացիներին հետևել տեղական զարգացումներին և կապի մեջ մնալ ամերիկյան դեսպանատների կամ հյուպատոսարանների հետ:
«Քանի որ ահաբեկչական հարձակումները, քաղաքական հեղաշրջումները և բռնությունը հաճախ տեղի են ունենում առանց նախազգուշացման, ԱՄՆ-ի քաղաքացիներին խորհուրդ է տրվում պահպանել բարձր զգոնություն և համապատասխան քայլեր ձեռնարկել ճանապարհորդելիս իրենց անվտանգության վերաբերյալ իրազեկումը բարձրացնելու համար: Բացի ահաբեկչությունների վերաբերյալ մտահոգություններից՝ ճանապարհորդողները պետք է զգոն լինեն հնարավոր քաղաքական խռովությունների, բռնության, ցույցերի և հանցավոր գործողությունների առնչությամբ»,- ասված է նախազգուշացման մեջ:
Առանձնահատուկ զգոնության կոչ է արվել մի շարք երկրների, այդ թվում՝ Թուրքիայի, Ուկրաինայի, Ալժիրի, Եգիպտոսի, Իրանի, Իրաքի, Իսրայելի, Հորդանան գետի արևմտյան ափի, Հորդանանի, Լիբանանի, Լիբիայի, Սաուդյան Արաբիայի, Մեքսիկայի և Վենեսուելայի վերաբերյալ:
Նշենք, որ Թուրքիայում ԱՄՆ քաղաքացիների համար արձակված նախազգուշացումը կապված է Երուսաղեմն Իսրայելի մայրաքաղաք ճանաչվելուց հետո անցկացվող բողոքի ակցիաների հետ: Նախօրեին զանգվածային բողոքի ակցիա է իրականացվել ԱՄՆ-ի դեսպանատան մոտ, այսօր նույնպես Թուրքիայի մի շարք քաղաքներում սպասվում են բողոքի զանգվածային ակցիաներ:
Associated Press-ի թղթակիցը Twitter-ում նշել է, որ նման նախազգուշացում վերջին անգամ արվել է 2003 թվականին Իրաքյան պատերազմի սկսվելուց հետո:










