Մակրոնը Երուսաղեմի հարցում համամիտ չէ Թրամփի հետ, մինչդեռ Նեթանյահուն կոչ է արել Եվրոպային հետևել ԱՄՆ նախագահի օրինակին
Ֆրանսիայի նախագահ Էմանուել Մակրոնն Իսրայելի վարչապետ Բինյամին Նեթանյահուի հետ հանդիպման ժամանակ հայտնել է, որ համակարծիք չէ Երուսաղեմը պաշտոնապես Իսրայելի մայրաքաղաք հայտարարած ԱՄՆ նախագահ Դոնալդ Թրամփի հետ:
Ինչպես նշում է Al Arabiya-ն, այս մասին 39-ամյա Մակրոնն ասել է Ելիսեյան պալատում մամուլի ասուլիսի ժամանակ:
Ֆրանսիայի ղեկավարը, դիմելով Նեթանյահուին, կոչ է արել քաջություն ցուցաբերել, բարի կամք դրսևորել պաղեստինցիներին առնչվող հարցերում ու վերսկսել խաղաղ բանակցային գործընթացը:
«Կոչ եմ արել վարչապետին պաղեստինցիներին առնչվող հարցերում քաջություն ցուցաբերել, որպեսզի կարողանանք դուրս գալ ստեղծված փակուղուց»,-ասել է Մակրոնը:
Մինչդեռ Reuters-ը հավելում է, որ ԵՄ երկիր ժամանած Նեթանյահուն հրապարակավ հավանություն է տվել Թրամփի որոշմանը՝ ընդգծելով, որ նույնպիսի քայլ է ակնկալում նաև Եվրոպայից:
Եվրոպական միության անդամ պետությունների արտաքին քաղաքական գերատեսչությունների ղեկավարների հետ հանդիպման նախօրեին Նեթանյահուն հայտարարել է, որ Թրամփի որոշումը թեև քննադատվել է միջազգային հանրության կողմից, սակայն կնպաստի Մերձավոր Արևելքում խաղաղության հաստատմանը: Նա կոչ է արել պաղեստինցիներին ճանաչել, որ Իսրայելը հրեական պետություն է, իսկ Երուսաղեմը՝ դրա մայրաքաղաքը:
Հայտնի է, որ նախքան այդ ԵՄ անվտանգության քաղաքականության ու արտաքին հարցերով գերագույն հանձնակատար Ֆեդերիկա Մոգերինին հայտարարել էր, որ Եվրամիությունը Երուսաղեմի հարցում կողմ է միջազգային փոխզիջմանը:
Հիշեցնենք, որ Թրամփն իր որոշման մասին հայտարարել է Սպիտակ տանը կայացած կարճատև ճեպազրույցի ժամանակ:
«Վստահ եմ, որ ժամանակն է Երուսաղեմը պաշտոնապես Իսրայելի մայրաքաղաք ճանաչել: Մինչ նախկին նախագահները միայն խոստումներ էին տալիս այս մասին, սակայն իրենց խոսքը չէին պահում, ես պատրաստ եմ դա անել: Երուսաղեմն Իսրայելի մայրաքաղաքն է: Այս փաստի ճանաչումը ոչ ավելին է, քան իրականության ընդունում»,-հայտարարել է Թրամփը:
Բազմաթիվ պետությունների ղեկավարներ շտապել են քննադատել այս որոշումը՝ նախազգուշացնելով, որ դա կսադրի Պաղեստինի հետ խաղաղ բանակցային գործընթացը:
Պաղեստինի ղեկավար Մահմուդ Աբասն ասել է, որ Թրամփի «ցավալի ու անընդունելի» որոշումն ուղղակիորեն վտանգի տակ է դնում խաղաղության հասնելուն ուղղված բոլոր ջանքերը:
«Այս որոշումը տարածաշրջանում «դժոխքի դռները» կբացի ԱՄՆ-ի համար»,-ասել է Պաղեստինում գործող «Համաս» շարժման ղեկավար Իսմայիլ Ռադվանը:










