ԱԺ–ում երկրորդ և ամբողջական ընթերցման ներկայացվեց ընտանեկան բռնության կանխարգելման մասին նախագիծը
ԱԺ արտահերթ նիստում երկրորդ ընթերցման և ամբողջական քննարկման ներկայացվեց «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքի նախագիծը:
Հիմնական զեկուցող Արդարադատության փոխնախարար Վիգեն Քոչարյանը նշեց, որ առաջին ընթերցումից մինչև երկրորդ ընթերցում ընկած ժամանակ պատգամավորներից առաջարկություններ չեն ստացել: Առաջարկություններ, ըստ նրա, չեն ստացել նաև կառավարությունից:
Այդուհանդերձ, Քոչարյանն անդրադարձավ մի քանի հարցադրումների, որոնք պատգամավորները հնչեցրել են առաջին ընթերցման ժամանակ, մինչդեռ ինքը հնարավորություն չի ունեցել դրանց անդրադառնալ:
Ըստ նրա, պատգամավորներից հարց էր հնչել, թե ինչով է պայմանավորված նախկին ամուսնու ծնողներին օրենքի իմաստով ընտանիքի անդամների շրջանակում ներգրավելը:
«Պայմանավորված է այն հանգամանքով, որ այստեղ նույնպես առկա են ռիսկեր, որ բռնության դեպքերը չլինեն: Եթե նայենք պրակատիկային, բռնության դեպքերը ծանր հետևանքներով եղել են նշյալ անձանց մասնակցությամբ կամ հանդեպ»,-ասաց նա:
Վիգեն Քոչարյանը նշեց, որ հարց էր հնչել, թե ով կարող է դիմել ոստիկանություն: «Ոչ այս և ոչ էլ ցանկացած այլ օրենքի շրջանակների անձինք չեն սահմանվում: Խոսքը հնարավոր հանցագործության մասին է, և նման սահմանափակումներ չեն կարող լինել»,-ասաց նա:
Զենքի առգրավման հետ կապված, թե ինչու այն անմիջապես չի նախատեսվում, փոխնախարարն ասաց, որ այդ դրույթը պաշտոնական որոշում կայացնելու դեպքերին է թողնվում:
Աջակցության կենտրոնների և ապաստարանների աշխատակիցների ընտրության ընդհանուր կարգ, ըստ փոխնախարարի, չեն նախատեսում:
Հարցին` արդյոք չարժե՞, որ անհետաձգելի միջամտության դեպքում դատարանը որոշում հաստատի, փոխնախարարը նշեց, թե նախագիծը նախկինում այդպես էր սահմանվել, բայց եկել են այն համոզման, որ եթե բռնություն կատարած անձը համաձայն է և չի բողոքարկում, դատարանը ծանրաբեռնելու կարիք չկա:
Իսկ թե ՏԻՄ-ը հնարավորություն ունի ապաստարան հիմնելու և տեղաբաշխելու, փոխնախարարը նշեց, որ, այո, օրենքով նման հնարավորություն ընձեռված է:
Նիստը վարող Միքայել Մելքումյանը տեղեկացրեց, որ նախագծի մասով հանձնաժողովի դրական եզրակացությունը կա:










