Հայաստանը մահմեդականներին ոչ բարեկամական երկիր դիտարկելը զավեշտալի է. իրանագետը՝ Ալիևի հայտարարության մասին (տեսանյութ)
Իրանագետ Վարդան Ոսկանյանի խոսքով՝ Ստամբուլում Իսլամական համագործակցության կազմակերպության երկրների գագաթնաժողովին Ադրբեջանի նախագահ Իլհամ Ալիևի հայտարարությունը, թե Հայաստանը չի կարող մահմեդականների բարեկամը լինել, անհեթեթություն է:
Նա Tert.am-ի հետ զրույցում նշեց, որ եթե մահմեդական աշխարհում Ադրբեջանի դաշնակիցներին դիտարկենք, ապա կնկատենք, որ այդ համագործակցությունը խարսխվում է միայն Թուրքիայի և մասնակիորեն նաև Պակիստանի հետ հարաբերությունների վրա:
«Այլ դաշնակիցներ մահմեդականների երկրների մեջ Ադրբեջանը չունի: Ունի հարաբերություններ տարբեր մահմեդական երկրների հետ, և այդ հարաբերությունները երբեմն հարթ չեն, խոսքը վերաբերում է, դիցուք, Իրանի հետ հարաբերություններին, խոսքը վերաբերում է Հյուսիսային Կովկասի բնակչությանը, մասնավորապես՝ Դաղստանին և այլն: Եվ մահմեդական համերաշխության մասին խոսելիս կամ նման հավակնություններ ունեցող Ադրբեջանի բռնապետը պետք է ի նկատի առնի, որ սեփական երկրում կան հսկայական խնդիրներ՝ կապված հենց մահմեդականների հետ, խոսքը վերաբերում է թե՛ ավանդական շիայականության հետևորդներին, թե՛ ծայրահեղական մահմեդական խմբավորումներին»,- նշեց նա՝ հորդորելով Ադրբեջանի ղեկավարությանը ուրիշի աչքի փուշը տեսնելու փոխարեն տեսնել սեփական աչքի գերանը:
Վարդան Ոսկանյանը նաև նշեց, որ Ադրբեջանը միակ մահմեդական երկիրն է, որտեղ շիա մահմեդականները հալածանքներ են կրել, աննախադեպ ճնշումների են ենթարկվել:
Իրանագետը նկատեց, որ Ադրբեջանը միշտ էլ փորձում է տարբեր կառույցների հարթակներում զանազան հայտարարություններում Արցախյան հիմնախնդրի վերաբերյալ ներկայացնել, թե իբր Հայաստանը մահմեդականներին բարեկամ երկիր չէ:
«Հայաստանն այն երկիրն է, որը բարեկամական հարաբերություններ ունի համաշխարհային մահմեդական այնպիսի կենտրոնի հետ, ինչպիսին Իրանն է: Այդ մասին հավաստում են Իրանի ամենաբարձր հոգևոր և աշխարհիկ ներկայացուցիչները: Հետևաբար` այս համատեքստում Հայաստանը մահմեդականներին ոչ բարեկամական երկիր դիտարկելը, խիստ զավեշտալի է»,- ասաց նա՝ հավելելով, որ Հայաստանը լավ հարաբերություններ ունի մահմեդական աշխարհի երկրներից շատերի հետ՝ Սիրիայի, Լիբանանի, Իրաքի, Հորդանանի, Կատարի, Արաբական Միացյալ Էմիրությունների և այլն:
Մանրամասները՝ տեսանյութում:










