Քադաֆիի որդին մտադիր է պայքարել Լիբիայի նախագահի պաշտոնի համար

10:50 • 18.12.17

Լիբիայի նախկին ղեկավար, «արաբական գարնան» ժամանակ պաշոնանկ արված ու սպանված Մուամմար Քադաֆիի որդին՝ Սեյֆ ալ Իսլամը, մտադիր է մասնակցել երկրում կայանալիք նախագահական ընտրություններին:

Ինչպես հայտնում է ria.ru-ն, այս մասին Egypt Today-ի հետ զրույցում հայտնել է Քադաֆիների ընտանիքին մոտ աղբյուրը:

«Սեյֆ ալ Իսլամը կառաջադրվի սպասվող նախագահական ընտրություններում, որոնք, հավանաբար, կկայանան 2018թ. կեսին»,-ասել է աղբյուրը:

Նշվում է, որ Քադաֆիի որդին արդեն նախընտրական ծրագիր ունի: Նա հույս ունի ՄԱԿ-ի աջակցությամբ Լիբիայում վերականգնել կայունությունը, ամրապնդել անվտանգությունը:

Աղբյուրը հիշեցնում է, որ Սեյֆ ալ Իսլամը մոտ 6 տարի գերության մեջ է գտնվել «Աբու Բաքր աս Սիդիք» զինված խմբավորման անդամների մոտ ու ազատ է արձակվել Լիբիայի խորհրդարանի հայտարարած համընդհանուր համաներման արդյունքում:

Հայտնի է, որ 2011թ. Քադաֆիի տապալումից հետո, նրա ու ընտանիքի մյուս անդամների նկատմամբ «որս» էր սկսվել: Ապստամբները սպանել են Քադաֆիին ու նրա մյուս որդուն՝ Մութասիմին: Մինչդեռ որդիներից մյուսը՝ Համիսը, զոհվել է Տրիպոլիի ռմբակոծության ժամանակ: Ինչ վերաբերում է Սեյֆ ալ Իսլամին, ապա նա գերեվարվել էր 2015թ. ու մահապատժի դատապարտվել:

Այժմ Լիբիայում քաղաքական ճգնաժամ է ու երկիշխանություն. երկրի արևելքում իշխում է ժողովրդի կողմից ընտրված խորհրդարանը, իսկ արևմուտքում՝ ՄԱԿ-ի ու Եվրոպական Միության աջակցությամբ ձևավորված ժամանակավոր կառավարությունը: