Ռուսաստանի բնակիչը դատարանի առաջ է կանգնել իր սիրելիի պատուհանից ներս մտնելու և ծաղիկներ ու գինի թողնելու համար

16:56 • 20.12.17

Ռուսաստանի Սվերդլովսկի մարզի դատախազությունը դատարան է ուղարկել 1995 թվականին ծնված բնակչի դեմ քրեական գործը։ Մարզի բնակիչը մեղադրվում է առանց իր սիրեցյալի իմացության նրա տուն ներթափանցելու համար: Այս մասին հայտնում է Российская газета-ն:

Աղբյուրի հաղորդմամբ՝ նոյեմբերի 18-ի երեկոյան երիտասարդը որոշել է նվերներ թողնել իրեն դուր եկած աղջկա բնակարանում:

«Նա պարանի և ավտոմեքենայի միջոցով կոտրել է պատուհանի ճաղավանդակը, կոտրել ապակին, ներթափանցել բնակարան, որտեղ թողել է մի շիշ գինի և ծաղկեփունջ», - նշել է Սվերդլովսկի մարզի դատախազությունը:

Նշվում է, որ երիտասարդն ամբողջությամբ ընդունել է իր մեղքը: Նրա համար նախատեսվում է պարտադիր կամ ուղղիչ աշխատանքի տեսքով պատիժ: