ԻՊ ահաբեկիչները թաքնվում են Սիրիայի և Հորդանանի սահմանին գտնվող փախստականների ճամբարում. սիրիացի պաշտոնյա
«Իսլամական պետություն» ահաբեկչական խմբավորման որոշ զինյալներ, որոնք փախուստի են դիմել Սիրիայում խմբավորման ջախջախումից հետո, թաքնվում են Հորդանանի սահմանի մոտ գտնվող սիրիական «Էր Ռուքբան» փախստականների ճամբարում: Այս մասին լրագրողներին հայտնել է Սիրիայում խաղաղ գործընթացի և սահմանամերձ վայրերում անվտանգության ապահովման՝ Հոմս նահանգի համակարգող Հաջ Ադելը, գրում է РИА Новости գործակալությունը:
«Ճամբարում գտնվող իմ մարդկանց հայտնած տեղեկության համաձայն՝ այնտեղ ներկա է զինյալների խումբ, որն իրեն անվանում է «Նոր սիրիական բանակ»: Նրանց թիվը մեծ չէ, խմբավորումը կազմված է ԻՊ-ից փախած մարդկանցից, որոնք եկել են «Էր Ռուքբան», ինչպես նաև փախստականներից, որոնք բռնի ուժով ստիպված են եղել համալրել խմբավորումը», - մանրամասնել է Ադելը:
Նրա խոսքով՝ «Էր Ռուքբան»-ում նկատվել են նաև օտարերկրացի վարձկաններ:
Սիրիացի պաշտոնյան նշել է, որ «Էր Ռուքբան»-ի բնակիչները հայտնվել են ծայրաստիճան ծանր իրավիճակում, քանի որ Հորդանանի սահմանը նրանց համար փակ է, և հումանիտար օգնություն այնտեղից իրենց չի հասնում: Բացի այդ՝ ընդդիմադիր խմբավորումների զինյալները խոչընդոտում են ՄԱԿ-ի կողմից մատակարարվող հումանիտար օգնության մուտքը շրջան: ՄԱԿ-ի տվյալներով՝ ճամբարում գտնվում է 50.000 փախստական, որոնք ունեն սննդամթերքի և դեղորայքի սուղ կարիք:










