Նյու Յորքի օդանավակայանում քաոսի հետևանքով ճամպրուկների կուտակումներ են գրանցվել, մի մասը հայտնվել է ձյան մեջ (լուսանկարներ)
Նյու Յորքի Ջոն Քենեդիի անվան օդանավակայանում աստիճանաբար վերականգնվում է նորմալ իրավիճակը:
Այնուամենայնիվ, ճանապարհորդները, որոնք վերջին շաբաթում բախվել էին օդանավակայանում ձնաբքի պատճառով ստեղծված քաոսին, ևս մի գլխացավանքի մեջ են հայտնվել՝ փորձելով ստանալ իրենց կորցրած ուղեբեռները, գրում է The Daily Mail-ը: Ինչպես նշում է լրատվամիջոցը, լուսանկարներից երևում է, որ նրանց ուղեբեռները հայտնվել են ձյան մեջ:
Երեքշաբթի օդանավակայանի 4-րդ տերմինալում արված լուսանկարներում երևում են հարյուրավոր ճամպրուկներ՝ ձյան մեջ դրված և թաքցված այնպես, որպեսզի ուղևորները չտեսնեն այդ տեսարանը:
Օդանավակայանից աղբյուրները հայտնել են NBC4-ին, որ օդային իշխանությունները նրանց հրահանգել են կուտակված ուղեբեռը տեղադրել այնպես, որ ուղևորները չտեսնեն:
Ավելի վաղ հաղորդվել է, որ Նյու Յորքի Ջոն Քենեդիի անվան օդանավակայանում անցած հինգշաբթի օրվանից աննախադեպ քաոս է ստեղծվել քաղաքում գրանցված ձնաբքից հետո։ Իրավիճակն է՛լ ավելի են բարդացրել օդանավակայանում տեղի ունեցած ջրատար խողովակի վթարը, թռիչքուղու վրա երկու ինքնաթիռների բախումը և զենք անցկացնել փորձող ուղևորի հետ կապված միջադեպը:















