Արամ Մանուկյանի արձանի՝ համացանցում հրապարակված տարբերակը 2 փուլով անցած մրցույթում չի քննարկվել և չի քվեարկվել. Հաղթանակ Շահումյան

Հայ ականավոր պետական ու ռազմական գործիչ, Առաջին Հանրապետության ներքին գործերի նախարար Արամ Մանուկյանի արձանի մրցութային հանձնաժողովի անդամ, նկարիչ Հաղթանակ Շահումյանը տարակուսած է, թե Արամ Մանուկյանի այդ ինչ արձանի լուսանկար է հրապարակվել համացանցում, քանի որ 2 փուլով անցած մրցույթում նման տարբերակ չի քննարկվել և քվեարկվել: Այս մասին  Tert.am-ի հետ զրույցում հայտնեց  Հաղթանակ Շահումյանը:

Հիշեցնենք, որ Երևանի քաղաքապետարանի «Ելք» խմբակցության անդամ Արայիկ Հարությունյանն իր ֆեյսբուքյան էջում հրապարակել է Արամ Մանուկյանի  արձանի մակետի լուսանկարը, ինչպես նաև հրապարակել մրցութային հանձնաժողովի կազմը:

«Տարբերակը, որ տեսա Ֆեյսբուքում, չի եղել կոնկուրսում: Մրցութային երկու նիստ է եղել, հանձնաժողովը երկու անգամ է  հավաքվել, և   նման օրինակ չի եղել: Բացի այդ, եղածներից էլ առաջին մրցանակ ստացող չի  եղել: Եղել է  2-րդ մրցանակ՝ խրախուսական, որը ստացավ Դավիթ Մինասյանը:  Իսկ այս տարբերակը, որ ներկայացված է, կոնկուրսի ժամանակ չի եղել, բայց համացանցից տեղեկացա, որ անգամ ավագանիում քննարկման է դրվել ու, իբր, հավանության է արժանացել: Թող իզուր ոչ մի բան հանձնաժողովի վրա չբարդեն»,-ասաց նկարիչը: Ի դեպ, նա մրցութային հանձնաժողովի 2 նիստերին էլ մասնակցել է:

Հարցին, թե հրապարակված լուսանկարի տարբերակը շա՞տ է տարբերվում 2-րդ մրցանակին արժանացածի էսքիզից, Հաղթանակ Շահումյանը կրկնեց՝ այս տարբերակը չի եղել և անգամ չգիտի՝ ով է հեղինակը:

«Մանավանդ գույնով, բանով: Ես չեմ էլ պատկերացնում, թե դա ինչ նյութերով պետք է արվի: Հետո… ես չգիտեմ, այն, ինչ տեսա, շատ կասկածելի բան է: Գիտեք ինչ, հանձնաժողովում պրոֆեսիոնալներ են, մարդկանց իզուր թիրախ պետք չէ դարձնել»,-հավելեց արվեստագետը:

Նա տարակուսում է, որ հնարավոր է՝ այդ տարբերակն են ուզել, բայց դա արդեն   քաղաքային իշխանությունների խնդիրն է: Նկարիչը նշել է, որ նույն կերպ Երևանի քաղաքապետարանը տեղադրել է «Արարատ 73»-ի ֆուտբոլիստների արձանը, թեև այն անգամ մեկ կողմ ձայն չի ունեցել:

Tert.am-ը Հաղթանակ Շահումյանի հայտնած տեղեկությունը փոխանցեց «Ելք» խմբակցության անդամ Արայիկ Հարությունյանին և փորձեց տեղեկանալ՝ ինչ արձանի նկար է նա հրապարակել: «Ելք»-ի անդամն առաջարկեց այդ հարցով դիմել մրցութային հանձնաժողովի նախագահին՝ Երևանի գլխավոր ճարտարապետ Տիգրան Բարսեղյանին: Վերջինս, սակայն, հեռախոսազանգերին չի պատասխանում: