Մոսկվայում ձերբակալվել է Դոնբասի հայ խոշոր գործարարներից Օլեգ Մկրտչյանը. «Մոսկովսկիյ կոմսոմոլեց»
Մոսկվայում փետրվարի 7-ին ձերբակալվել է «Դոնբասի արդյունաբերական միության» համահիմնադիր Օլեգ Մկրտչյանը, հայտնում է mk.ru-ն:
Կայքը գրում է, որ Օլեգ Մկրտչյանն ազդեցիկ անձ է ինչպես Դոնբասում, այնպես էլ ամբողջ հետխորհրդային տարածքում. բացի «Դոնբասի արդյունաբերական միության» երեք հիմնադիրներից մեկը լինելուց՝ նա նաև կապված է երեք տարբեր երկրներում երեք ֆուտբոլային ակումբների կառավարման հետ, բարեգործ է և մասնակցություն է ունեցել հանրահայտ ֆուտբոլիստ Հենրիխ Մխիթարյանի ճակատագրին:
Ինչպես հայտնել է լրատվամիջոցը՝ վկայակոչելով «Դոնբասի արդյունաբերական միության» ուկրաինական ղեկավարությանը մոտ սեփական աղբյուրներին, Մոսկվայում ձերբակալությունը կարող է կապված լինել միայն «Դոնբասի արդյունաբերական միության» նախագծերի համար հատկացված միջոցներն Օլեգ Մկրտչյանի կողմից իր այլ բիզնես նախագծերի վրա ծախսելու փաստի հետ:
Լրատվամիջոցը նաև պատմել է, որ 2017 թվականի ամռանը գործարարը փորձել է վերադարձնել «Алчевский металлургический комбинат», «Алчевский коксохимический завод» և «Экоэнергия» ընկերությունների նկատմամբ վերահսկողությունը, որոնց նկատմամբ այժմ «արտաքին պետական հսկողություն» է սահմանվել ինքնահռչակ Լուգանսկի Ժողովրդական Հանրապետության կողմից:
Օլեգ Մկրտչյանին է նաև պատկանել հայկական ֆուտբոլային «Բանանց» ակումբը, նա ներգրավված է եղել Դոնեցկի «Մետալուրգ» ակումբի կառավարմանը և օգնել է ռուսական «Կուբանին»:
Նշվում է, որ Դոնեցկի «Շախտյորից» Դորտմունդի «Բորուսիա» Հենրիխ Մխիթարյանի տրանսֆերի ժամանակ գործարարը ստացել է 27,5 միլիոն եվրո, քանի որ խաղացողի իրավունքի 50 տոկոսը պատկանում էր նրան:











