Չեխիայում հայտարարել են ԵՄ-ից երկրի դուրս գալու անթույլատրելիության մասին
Եվրամիության կազմից Չեխիայի դուրս գալու՝ Brexit-ի նմանությամբ Czexit-ի հարցով հանրաքվե տեղի չի ունենա: Այդ մասին լրագրողներին ասել է Չեխիայի վարչապետի պաշտոնակատար Անդրեյ Բաբիշը՝ քննարկելով նման համաժողովրդական հանրաքվեի հնարավորությունը, գրում է «ՌԻԱ Նովոստի»-ն:
Նրա խոսքով՝ Չեխիայի նախագահ Միլոշ Զեմանի հետ հանդիպմանը նրանք համաձայնվել են, որ երկիրը եղել և մնում է ԵՄ-ի և ՆԱՏՕ-ի հուսալի բաղկացուցիչ մաս:
«Czexit-ի հարցով հանրաքվե տեղի չի ունենա: Ես դրան երբեք չեմ համաձայնի: Ես կարծում եմ, որ մենք կարող էինք ԵՄ-ում ավելի կարևոր դեր խաղալ»,- հայտարարել է Բաբիշը:
2017 թվականի հոկտեմբերի ընտրությունների արդյունքներով Չեխիայի խորհրդարանի կազմում ներառված «Ազատություն և ուղիղ ժողովրդավարություն» կուսակցությունն ակտիվ հանդես է գալիս օրենսդրությունում համաժողովրդական հանրաքվեների ներդրման օգտին, ընդ որում՝ այդ կուսակցության առաջնորդ Տոմիո Օկամուրայի կարծիքով՝ առաջիններից մեկը կարող էր դառնալ Եվրամիության կազմում, իսկ ավելի ուշ՝ ՆԱՏՕ-ի կազմում երկրի լինելու մասին քվեարկությունը:










