Իրաքը հայտարարել է, որ ԻՊ-ի դեմ պայքարից հետո վերակառուցման համար կպահանջվի 88 միլիարդ դոլար

15:49 • 12.02.18

«Իսլամական պետություն» ահաբեկչական խմբավորման դեմ երեք տարվա պատերազմից հետո Իրաքի վերակառուցման համար կպահանջվի 88,2 միլիարդ դոլար: Այդ մասին հայտարարել են Իրաքի պաշտոնյաները՝ երկուշաբթի միջազգային դոնորների համաժողովի ժամանակ, հայտնում է Reuters գործակալությունը:


Դոնորներն ու ներդրողները հանդիպել էին Քուվեյթում՝ քննարկելու համար Իրաքի տնտեսությունն ու ենթակառուցվածքները վերակառուցելու ջանքերը:


Իրաքը հաղթանակ է հռչակել «Իսլամական պետության» դեմ դեկտեմբերին՝ հետ վերցնելով բոլոր տարածքները, որոնք զինյալները գրավել էին 2014 և 2015 թվականներին:


Երկրի պլանավորման նախարարությունից հայտարարել են, որ կարճաժամկետ կտրվածքով կպահանջվի 22 միլիարդ դոլար և ևս 66 միլիարդ դոլար միջնաժամկետում: