Լոնդոնի օդանավակայանը փակվել է Թեմզայում հայտնաբերված ռումբի պատճառով
Մեծ Բրիտանիայի մայրաքաղաքի Լոնդոն-Սիթի օդանավակայանը փակվել է, երբ Թեմզայում Երկրորդ համաշխարհային պատերազմի ժամանակներից մնացած ռումբ է հայտնաբերվել, հայտնում է BBC-ն:
Նշվում է, որ օդանավակայանը փակ է մնալու ամբողջ օրը, և բոլոր թռիչքները չեղարկվելու են:
Երկրորդ համաշխարհային պատերազմից մնացած ռումբը հայտնաբերելուց հետո ոստիկանությունը, որպես կանխարգելիչ միջոց, անվտանգության գոտի է ստեղծել: Դրա հետևանքով Լոնդոն-Սիթի օդանավակայանն այժմ փակ է: Այդ մասին ասված է օդանավակայանի հաղորդագրությունում:
Սքոթլանդ-Յարդում հայտնել են, որ ռումբը հայտնաբերվել է փետրվարի 11-ի առավոտյան՝ օդանավակայանի մոտակայքում նախագծա-հետազոտական աշխատանքների ընթացքում:










