Դուբայում 6 երկրի մասնակցությամբ Երջանկության գլոբալ կոալիցիա է ստեղծվել

11:27 • 13.02.18

Դուբայում անցկացվող 6-րդ համաշխարհային կառավարական համաժողովի շրջանակում հայտարարվել է Երջանկության գլոբալ կոալիցիայի ստեղծման մասին:

Ինչպես նշում է vesti.ru-ն, դրանում ներառվել է 6 երկիր՝ Արաբական Միացյալ Էմիրությունները, Ղազախստանը, Մեքսիկան, Պորտուգալիան, Կոստա Ռիկան և Սլովենիան:

Երջանկության գլոբալ կոալիցիայի ստորագրման արարողության ժամանակ անձամբ ներկա է եղել ԱՄԷ-ի վարչապետ, Դուբայի կառավարիչ Մուհամեդ բեն Ռաշիդ ալ Մաքթումը: Փաստաթղթի տակ իրենց ստորագրությունն են դրել անդամ 6 երկրի նախարարները:

Ալ Մաքթումն ընդգծել է, որ ժամանակակից աշխարհը կոալիցիայի այնպիսի նոր ձևաչափերի կարիք ունի, որոնք կաշխատեն հանուն ազգերի երջանկության ու բարեկեցության:

«Ժամանակն է համախմբել աշխարհի երկրների կառավարությունների ջանքերը՝ մարդկանց կյանքի որակը բարելավելու ու նրանց երջանկացնելու համար՝ նոր մոտեցումների ու մեխանիզմների ձևավորման նպատակով»,-ասել է Ալ Մաքթումը:

Հատկանշական է, որ ԱՄԷ-ի իշխանություններին հաջողվել է ճիշտ քաղաքականության արդյունքում հասնել բնակիչների համար կյանքի բարձր որակի: Նրանք հետևողականորեն ժամանակակից տեխնոլոգիաները ներդնում են կյանքի տարբեր ոլորտներում: ԱՄԷ-ում «երջանկություն» բառը դարձել է պետական մարմինների աշխատանքի կարևորագույն նպատակներից ու չափորոշիչներից մեկը:

Երկրի իշխանությունները համոզված են, որ Էմիրությունների բնակիչները պետք է բարեկեցիկ ու հարմարավետ ապրեն, օգտվեն տեխնիկական առաջընթացի նվաճումներից ու սեփական ներդրումն ունենան ոչ միայն իրենց երկրի կամ արաբական տարածաշրջանի, այլև ամբողջ աշխարհի բարեկեցիկ ու երջանիկ ապագայի ստեղծման գործում: