2009 թվականից ՀԱՀ-ը նախագահող Ջեյկոբ Զուման հրաժարական է տվել

10:01 • 15.02.18

Հարավաֆրիկյան Հանրապետության նախագահ Ջեյկոբ Զուման ժողովրդին հղած ուղերձում հայտարարել է, որ իր պաշտոնից հեռանալու հարցը պետք է որոշի խորհրդարանը, սակայն այնուհետ հայտարարել է իր «անհապաղ» հրաժարականի մասին, հայտնում է BBC-ն:


«Ես չեմ վախենում անվստահության քվեից կամ պաշտոնանկությունից»,- ասել է նա՝ ելույթ ունենալով հեռուստատեսային ուղերձով և նշելով, որ պաշտոնից իրեն հեռացնելու հարցը պետք է լուծի խորհրդարանը: Սակայն 30 րոպեանոց ելույթի վերջում նա ասել է, որ որոշել է «անհապաղ» հեռանալ նախագահի պաշտոնից:


Նախագահի պարտականությունները կատարելու է փոխնախագահ Սիրիլ Ռամաֆոսան:


Ավելի վաղ հաղորդվել է, որ երկրում իշխող «Աֆրիկյան ազգային կոնգրես» կուսակցությունը հայտարարել է Զումային հրաժարականի համար 48 ժամ տրամադրելու համար: Չստանալով նախագահի պատասխանը՝ կուսակցությունում խոստացել են Զումային անվստահության քվեի օգտին քվեարկել և փորձել նրան փոխարինող նշանակել Ռամաֆոսային:


Վերջին ժամանակներս երկրի ղեկավարությունը մեղադրվում էր պետական գույքը յուրացնելու համար: Զուման հերքում է իր մեղքը՝ պնդելով, որ բոլոր գործարքները վերահսկել են կառավարական հատուկ ծառայությունները:


75-ամյա Ջեյկոբ Զուման ՀԱՀ-ի նախագահի պաշտոնը զբաղեցնում է 2009 թվականից ի վեր: