ԱԺ-ը մերժեց «Ելքի» ներկայացրած «ՀՀ հարկային օրենսգրքում փոփոխություններ և լրացումներ կատարելու մասին» օրենքի նախագիծը

15:41 • 16.02.18

«Ելք» խմբակցության կողմից ներկայացված «ՀՀ հարկային օրենսգրքում փոփոխություններ և լրացումներ կատարելու մասին» օրենքի նախագիծն Ազգային ժողովը մերժեց:

Նախագիծն առաջին ընթերցմամբ դրվեց քվեարկության և 35 կողմ, 38 դեմ ձայներով չընդունվեց:

Մինչ այդ վարման կարգով ձայն խնդրեց ՀՀԿ պատգամավոր Հակոբ Հակոբյանը և  հայտարարեց, որ իր ասածները շահարկման առիթ չդառնան, ցանկանում է կրկնել այն, ինչ ասել է:

«Բառացի ասել եմ, նախագիծն ընդունելու դեպքում բյուջեի եկամուտները կնվազեն 32 մլրդով, որից 17 մլրդից  կօգտվեն նրանք, ովքեր աշխատում են և վճարում են եկամտային հարկ, իսկ 15 մլրդը, եթե ամբողջ վառելիքի ծախսն էլ գնա գյուղմթերքին, կկազմի  0,3%-ը. ես այլ բան չեմ ասել»,- ասաց նա:

Վարման կարգով ձայն խնդրեց նաև «Ծառուկյան» խմբակցության պատգամավոր Վարդան Բոստանջյանը.

«Ես էլ ուզում եմ ասել, որ քիչ է մնում՝ հավատամ Հակոբ Հակոբյանի մարգարեական մտքերին»: 

Նշենք, որ ըստ նախագծի հիմնավորման՝ 2018 թվականի հունվարի 1-ից ուժի մեջ մտած ՀՀ հարկային օրենսգրքով էներգակիրների՝ բենզին, դիզելային վառելիք, սեղմված բնական գազ, հարկային բեռի ավելացումը հանգեցրել է այդ և առաջին անհրաժեշտության ապրանքատեսակների գների բարձրացման:

Նոր նախագծի ընդունմամբ՝ ընդդիմադիր պատգամավորները վստահ էին, որ էներգակիրների հարկային բեռը կթեթևանա` նպաստելով դրանց էժանացմանը:

Ըստ նախագծի` 150 հազարից մինչև 450 հազար դրամ ամսական աշխատավարձ ստացող ֆիզիկական անձանց եկամտային հարկը կվերադարձվեր մինչև Հարկային օրենսգրքի ուժի մեջ մտնելու պահը կիրառված դրույքաչափին: