Սպասվող ամերիկյան պատժամիջոցները լուրջ վտանգ չեն ներկայացնում ՌԴ տնտեսության համար. Մեդվեդև
ԱՄՆ նոր պատժամիջոցները լուրջ վտանգ չեն ներկայացնում ՌԴ տնտեսության և ռուսների համար: Այդ մասին հայտարարել է ՌԴ վարչապետ Դմիտրի Մեդվեդևը, հայտնում է «ՌԻԱ Նովոստի»-ն:
«Նրանից, որ նրանք այնտեղ ինչ-որ հերթական ցուցակներ կհրապարակեն կամ ինչ-որ որոշումներ կհայտարարեն, սկզբունքորեն ոչինչ չի փոխվի: Դա չի նշանակում, որ մենք չենք հետևում իրավիճակին, մենք պատրաստվում ենք: Օրինակ՝ վերջերս հայտնվել է հատուկ բանկ, որը պետք է զբաղվի, ի թիվս այլ հարցերի, նաև ռազմական արդյունաբերության սպասարկմամբ, պարզապես նրա համար, որ մեզ հանկարծակիի չբերեն: Ընդհանուր առմամբ, ես ոչ մի զգալի վտանգ մեր տնտեսության, առավել ևս՝ մեր երկրի քաղաքացիների համար չեմ տեսնում»,- ասել է Մեդվեդևը «Ռոսիա 24» հեռուստաալիքին տված հարցազրույցում:
Ավելի վաղ հաղորդվել է, որ ԱՄՆ ֆինանսների նախարարությունը հրապարակել է պատժամիջոցների մասին օրենքի շրջանակում «կրեմլյան ցանկ», որում ընդգրկվել են 96 խոշոր գործարարներ, 114 պաշտոնյաներ և պետական ընկերությունների ղեկավարներ, այդ թվում՝ ռուսաստանաբնակ հայ գործարարներ Սամվել Կարապետյանը, Դանիլ Խաչատուրովը, Սերգեյ Գալիցկին (Հարությունյան):
ԱՄՆ ֆինանսների նախարարության պատրաստած զեկույցում ներառվել են անձանց անուններ, որոնք կարող են ապագայում հայտնվել հնարավոր պատժամիջոցների տակ:
ԱՄՆ նախագահ Դոնալդ Թրամփի վարչակազմը քննադատության է ենթարկվել այն պատճառով, որ «կրեմլյան զեկույցը» նոր պատժամիջոցներ չէր սահմանում: Դրանից հետո «կրեմլյան զեկույցի» հիման վրա մոտ ապագայում նոր պատժամիջոցներ է խոստացել ԱՄՆ ֆինանսների նախարար Սթիվեն Մնուչինը:










