Facebook-ը հայտարարել է անվտանգության մասնագետների թիվը կրկնապատկելու մասին ՌԴ քաղաքացիների և ընկերությունների դեմ մեղադրանքներից հետո
Facebook սոցիալական ցանցի ղեկավարությունը մտադիր է մի շարք միջոցներ ձեռնարկել տեղեկատվական անվտանգության ոլորտում, մասնավորապես՝ երկու անգամ մեծացնել այդ ոլորտի մասնագետների թիվը: Այդ մասին հայտարարել է Facebook-ի փոխնախագահախ Ջոել Կապլանը, հայտնում է New York Daily News-ը:
Ավելի վաղ ԱՄՆ հատուկ հարցերով դատախազ Ռոբերտ Մյուլերը մեղադրանք է առաջադրել 13 ՌԴ քաղաքացու և 3 ռուսական ընկերության՝ «դավադրություն ԱՄՆ-ի դեմ» և «խարդախություն» հոդվածներով: Դատախազի կարծիքով՝ գործակալության աշխատակիցները միջամտել են ԱՄՆ-ում 2014-ին անցկացված ընտրություններին, ինչպես նաև 2016-ի նախագահական ընտրություններին:
«Այսօրվա նորությունը հաստատում է անցած տարվա մեր հայտարարությունը, որ օտարերկրացի ուժերը համակարգված ջանքեր են գործադրել մեր ժողովրդավարության վրա հարձակում գործելու համար»,- հայտարարել է սոցցանցի փոխնախագահը:
Անցած տարվա սեպտեմբերին Facebook-ի անվտանգության համար պատասխանատու Ալեքս Ստամոսը հայտարարել է, որ ամերիկյան նախագահական ընտրությունների ընթացքում Ռուսաստանը 100 հազար դոլար է ծախսել սոցցանցում քաղաքական բնույթի գովազդային հաղորդագրություններ տարածելու համար կեղծ էջեր ստեղծելու միջոցով:
«Մենք գիտենք, որ կարող ենք ավելին անել ապագա հարձակումները կանխելու համար»,- նշել է Կապլանը՝ խոսելով սոցիալական ցանցը հաքերների կողմից իրենց նպատակների համար օգտագործելու հնարավորության մասին:
«Մենք այդ ուղղությամբ զգալի միջոցներ ենք ներդնում, մասնավորապես, այս տարի մեծացնում ենք անվտանգության ոլորտում աշխատող մարդկանց թիվը 10 հազարից 20 հազար: Մենք նաև շարունակում ենք սերտորեն համագործակցել ՀԴԲ-ի, ներքին անվտանգության նախարարության և այլ ընկերությունների հետ երկիրը և մեր սոցցանցից օգտվող մարդկանց պաշտպանելու միջոցներ մշակելու համար»,- ասել է Facebook-ի ներկայացուցիչը:










