Ընթերցողների բացարձակ թիվը ցույց է տալիս, որ մենք շատ խորը անդունդում ենք, բայց արագ բարձրանում ենք. Արմեն Մարտիրոսյան

2015 թվականին յուրաքանչյուր անուն գրքից միջինում գնվում էր 40 գիրք, այսինք գիրք կարդում էր հիսուն հազար մարդուց մեկը, 2016 թվականին այդ թիվն աճեց 20 տոկոս, և ստացվեց 40 հազար մարդուց մեկն էր կարդում, իսկ 2017 թվականին այդ թիվը հասավ 74-ի, գրեթե երկու անգամ բարձրացավ և ստացվեց, որ 25 հազար մարդուց մեկն է կարդում գիրք: Այս մասին Tert.am-ի հետ զրույցում ասաց «Անտարես»  մեդիա հոլդինգի նախագահ Արմեն Մարտիրոսյանը` անդրադառնալով գիրք նվիրելու օրվան, որը նշվում է այսօր` Հովհաննես Թումանյանի ծննդյան օրը:

Նա նշեց, որ սա «Անտարեսի» գրքերի վիճակագրությունն է և ցույց է տալիս աճի արագության տեմպերը: «Բացարձակ թվերն ասում են, որ մենք շատ խորը անդունդում ենք և արագ բարձրանում ենք»-ասաց նա:

Անդրադառնալով ֆեյսբուքյան լայքահավաքին, որի միջոցով մարդիկ գիրք էին նվեր ստանում Արմեն Մարտիրոսյանն ասաց. «Շատերը կշտամբում են, ասելով՝ ինչո՞ւ եք մարդկանց ստիպում «լայք մուրալ»: Բայց այդ լայք մուրալը նշանակում է, որ դու գիրքը ցույց ես տալիս քո 700 ընկերներին և ասում ես, որ իրենք տեսնեն, թե դա ինչ գիրք է և լայքեն, այսինքն 700 ընկերոջ ծանոթացնում ես գրքի հետ: Այսինքն` մարդը, ում ասում են մուրող, լուսավորիչ է, և իր օրինակով ցույց տվեց այդ գրքի բովանդակության պահանջարկը: Սա ռեալ լուսավորչական, դաստիարակչական աշխատանք է, ով անում է մեկը, ում անվանում են մուրող: Ես երջանիկ եմ, որ ես լայքամուրացկան եմ, քանի որ ես կարողացել եմ 800 անուն գրքեր մոտավորապես 200 հազար մարդու խնդրել, որ ուշադրություն դարձնեն»,-ասաց նա:

Արմեն Մարտիրոսյանը նշեց նաև, որ դպրոցներում յոթ տարի առաջ մեկնարկել է վեցերորդ դասարանցիների շրջանում դպրոցական ընթերցանության օլիմպիադան, որը կազմակերպել է «Անտարես»-ը, Dasaran.am-ի հետ համատեղ: «Մենք հասկանում էինք, որ գնալով մեր ընթերցողները պակասում են և եթե մենք չցանենք, ուղղակի չենք կարող քաղել, քանի որ պետությունը սերմ չի ցանում ընթերցող աշակերտի համար»,-ասաց նա:

Նա պատմեց, որ տարվա վերջում ուսումնասիրել են այն դասարանների աշակերտների գրքերը, որտեղ անց է կացվել օլիմպիադան և որտեղ անց չի կացվել: «Օրինակ «Ա» դասարանի աշակերտների գրքերը, որտեղ անցկացվել է օլիմպիադան, բոլորը մաշված գրքեր են և ոչ մի ճղճղված գիրք չկար, իսկ «Բ» դասարանում կան բացարձակ նոր գրքեր և ճղճղված գրքեր: Այսինքն՝ օլիմպիադան գրքի նկատմամբ վերաբերմունք տվել է»-ասաց նա և նշեց, որ բացի այդ գրադարանավարները հայտնել են, որ «Ա» դասարանի աշակերտները ավելի շատ են օգտվել գրադարանից, քան Բ դասարանի, այսինքն՝ գրականության նկատմամբ հետաքրքրությունը մեծանում է:

Նա նշեց, որ օլիմպիադայում հաղթող աշակերտը նվեր է ստանում ԱՊՊԱ՝ ծնողի ավտոմեքենայի համար, գիրք,  իսկ հանրապետական օլիմպիադայի հաղթողը ԱՄՆ դեսպանատան աջակցությամբ իր ծնողին տանում է Փարիզ: «Աշխարհում ո՞ր վեցերորդ դասարանցի երեխան կարող է իր ծնողին տանել Փարիզ, ընթերցող աշակերտը, սա շատ լուրջ ու առողջ սերմ է»,-ասաց նա:

Արմեն Մարտիրոսյանն ասաց, որ այսօր մեկնարկել է օլիմպիադայի յոթերորդ տարին: «Սա, ցավոք, միակ միջոցառումն է, որ յոթ տարի շարունակ կազմակերպվում է  ընթերցանության մակարդակը բարձրացնելու նպատակով, պետությունը ուրիշ ոչ մի դրամ չի ծախսում այդ նպատակով»,-ասաց նա:

Նա հիշեցրեց, որ գիրք նվիրելու օրվա գաղափարը պատկանում է ազգային գրադարանի նախկին տնօրենին Դավիթ Սարգսյանին, որը կարողացավ հանրահռչակել  գրողներին միության նախկին նախագահ Լևոն Անանյանը: