Ռուսաստանում երկու ընտանիք հայտնաբերել է, որ իրենց երեխաներին 40 տարի առաջ շփոթել են ծննդատանը

13:39 • 27.02.18

Ռուսաստանի Պերմի երկրամասի ծննդատներից մեկում 1978 թվականին լույս աշխարհ եկած աղջիկների մայրերը պատրաստվում են դատարան դիմել. նրանք պարզել են, որ ծննդատանն իրենց երեխաներին շփոթել են: Այս մասին «РИА Новости»-ին պատմել է փաստաբան Իգոր Սավվինը:

Նշվում է, որ աղջիկները ծնվել են մարտի յոթին: Այդ օրը ծննդաբերել է չորս կին, այդ թվում՝ Ռիմա Շվեցովան և Յուլյա Սավելևան:

Գործակալության հաղորդմամբ՝ Շվեցովան անմիջապես կասկածել է, որ ինքը դաստիարակում է ուրիշի երեխային: Այս կասկածների պատճառով կինն անընդհատ վեճեր է ունեցել իր ամուսնու հետ, ինչի հետևանքով նրանք ամուսնալուծվել են:

Սավելևների ընտանիքում ուշադրություն չեն դարձրել դստեր «այլ լինելուն». Յուլյան սկսել է մտածել այս թեմայի շուրջ միայն այն ժամանակ, երբ Ռիման կիսվել է իր ենթադրություններով:

Փաստաբանը հավելել է, որ ԴՆԹ թեստը հաստատել է Շվեցովայի կասկածները:

«Բարոյական վնասը ներառում է բարոյական տառապանքների հասկացությունը, որոնք բոլորի մոտ անհատական են: Այս պատմության մեջ հիվանդանոցում թույլ տրված մի սխալի հետևանքով վնասը տարբեր ձևով է անդրադարձել բոլորի վրա, ահա թե ինչու մենք չորս հայց ենք պատրաստում», - ասել է Սավվինը:

Աղբյուրը մանրամասնում է, որ գործում մեղադրյալներ կլինեն Պերմի երկրամասի առողջապահության նախարարությունը, ՌԴ առողջապահության նախարարությունը, Ֆինանսների նախարարությունը, երկրամասի կառավարությունը և տեղական հիվանդանոցը: