Դավթաշենի կամրջի տակ դստեր հետ հայտնաբերված մոր նկատմամբ նշանակվել է հետմահու դատահոգեբանական փորձաքննություն
Փետրվարի 15-ին Դավթաշենի կամրջից դստեր հետ ինքնասպանություն գործած մոր նկատմամբ նշանակվել է հետմահու դատահոգեբանական փորձաքննություն:
Այս մասին Tert.am-ի հետ զրույցում ասաց ՀՀ քննչական կոմիտեի նախագահի խորհրդական Սոնա Տռուզյանը:
Նա հայտնեց, որ նշանակված փորձաքննության շրջանակներում փորձագետներին հարցեր են առաջադրվել՝ պարզելու դեպքին նախորդած ժամանակահատվածում մոր հոգեբանական վիճակը. «Նշանակվել է հետմահու դատահոգեբանական փորձաքննություն, որով կպարզվի, թե արդյոք Գ.Հ.-ի հոգեբանական վիճակը կարո՞ղ էր նրան դրդել ինքնասպանության, թե ոչ»:
Նշենք, որ Դավթաշենի կամրջի տակ հայտնաբերված Գ. Հ.-ի և նրա 9-ամյա դստեր մահվան փաստի առթիվ հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասով՝ սպանություն և 110-րդ հոդվածի 1-ին մասով՝ ինքնասպանության հասցնելը:










