Հայկական խնձոր արտահանող մեքենաները մուտք են գործում ՌԴ. ՀՀ կառավարություն
Ռուսական կողմի հետ բանակցությունները՝ հայկական խնձոր արտահանող մեքենաների մուտքը թույլ տալու համար, արդեն ավարտվել են:
Այս մասին Tert.am-ի հարցմանն ի պատասխան հայտնում են Կառավարության Տեղեկատվության և հասարակայնության հետ կապերի վարչությունից:
«Խնդիրը կարգավորվել է, և այս պահին բեռնատարներն աստիճանաբար անցում են սահմանը՝ մուտք գործելով Ռուսաստանի Դաշնություն: Գործընթացում ներգրավված են եղել մի քանի գերատեսչություններ, որոնցից յուրաքանչյուրն աշխատանք է իրականացրել իր մասով»,- տեղեկացրին Կառավարությունից:
Հիշեցնենք, որ երեկ Օհանավան համայնքի բնակիչները փակել էին դեպի Օհանավան տանող ճանապարհը` հայտարարելով, որ չեն կարողանում իրենց ապրանքն արտահանել Ռուսաստան, քանի որ իրենց ապրանքը՝ խնձորը սահմանին համարել են թուրքական, հետո՝ պարսկական, իսկ հետո նշել, թե պիտակը չկա: Երեկ, ինչպես գյուղացիներն էին նշում, 11 օր է՝ իրենց մեքենաները կանգնած են:










