Մենք ուզում ենք արտահերթ ընտրություններն արագ անցկացնել, սակայն ստիպված ենք կոնսեսուսի գալ մյուս ուժերի հետ. Ռ. Ռուբինյանը՝ ընտրությունների ժամկետի տեսականորեն հետաձգման մասին

Մենք ուզում ենք և հաստատակամ ենք արտահերթ ընտրությունների կազմակերպման հարցում, սակայն հաշվի առնելով քաղաքական իրողությունները, մենք ստիպված ենք լինելու փորձել կոնսեսուսի գալ մյուս քաղաքական ուժերի հետ: Այս մասին Tert.am-ի հետ զրույցում ասաց ՀՀ արտգործնախարարի տեղակալ, «Քաղաքացիական պայմանագիր» կուսակցության անդամ Ռուբեն Ռուբինյանը՝ անդրադառնալով ԱԺ արտահերթ ընտրությունները նախանշված 2018 թ.-ից առավելագույնը մեկ տարում անցկացնելու իրողությանը: «Եթե կոնսեսուսի չգանք, արդեն այլ իրողություններ ի հայտ կգան: Իրողություններ կլինեն, երբ կփորձենք արտահերթ ընտրությունների հասնելու այլ ճանապարհներ գտնել»,- նշեց Ռուբեն Ռուբինյանը:

- Կառավարության` նախօրեին հրապարակված ծրագրում արտահերթ ընտրությունների անցկացման ժամկետը առավելագույն մեկ տարին է, սակայն նախկինում խոսելով արտա­հերթ խորհրդարանական ընտ­րությունների անցկացման ժամկետների մասին՝ վարչապետ Նիկոլ Փաշինյանը հայտա­րարել էր, որ դրանք կարող են անցկացվել մինչև այս տարվա վերջ: Ինչո՞վ եք պայմանավորում ժամկետների երկարաձգումը:

- Ժամկետի երկարաձգում չկա: Քանի որ արտահերթ ընտրությունների անցկացումը կախված է նաև քաղաքական ուժերի միջև հիպոթետիկ պայմանավորվածության և կոնսեսուսի հասնելու կամ չհասնելու, և դրանցից բխող գործընթացների հետ, ընդամենը նշվում է առավելագույն ժամկետ: Բայց երբ ասում ենք, որ առավելագույնը մեկ տարում, դա չի նշանակում, որ ընտրությունները չեն կարող լինել մի քանի ամսում:

- Ավելի հավանական է, որ այս տարվա ընթացքում կանցկացվե՞ն արտահերթ ընտրությունները, թե՞ 2019 թ.-ին:

- Մեր նպատակն է հնարավորինս արագ կազմակերպել արտահերթ ընտրություններ, սակայն ապահովելով անհրաժեշտ փոփոխությունների իրագործումը՝ ներառյալ Ընտրական օրենսգիրքը և այլ փոփոխություններ:

- Այժմ առավելագույնը մեկ տարի եք նշում, բայց ծրագրի հրապարակումից առաջ 2018 թ.-ի ընթացքում էիք ասել: Կարո՞ղ ենք ասել, որ սա կապված է այլ քաղաքական ուժերի հետ Ընտրական օրենսգրքի փոփոխությունների վերաբերյալ համաձայնությունը ձգձգվելու,  դժվար ձեռքբերվելու հետ:

- Այն, որ որոշ ուժեր խնդիր են ունենալու դրա հետ, դա նորություն չէ: Մենք բազմիցս տեսել ենք, որ Հանրապետական կուսակցության ներկայացուցիչներ ասել են, որ հիմա արտահերթ ընտրությունների կարիք չկա: Այսինքն՝ տրամաբանությունը հետևյալն է, որ մենք ուզում ենք և հաստատակամ ենք արտահերթ ընտրությունների կազմակերպման հարցում, սակայն հաշվի առնելով քաղաքական իրողությունները, մենք ստիպված ենք լինելու փորձել կոնսեսուսի գալ մյուս քաղաքական ուժերի հետ: Եթե կոնսեսուսի չգանք, արդեն այլ իրողություններ ի հայտ կգան:

- Ի՞նչ իրողությունների մասին է խոսքը:

- Իրողություններ կլինեն, երբ կփորձենք արտահերթ ընտրությունների հասնելու այլ ճանապարհներ գտնել:

- Որո՞նք են այլ ճանապարհները՝ հանրաքվե՞ն, ժողովրդի ճնշման միջոցո՞վ արտահերթ ընտրությունների հասնելը:

- Քանի դեռ մենք իմ ասած առաջին տարբերակի ընթացքում ենք, չէի ուզի խոսել մյուս տարբերակների մասին: