Ղազախստանի իշխանություններն արգելել են ռուսական 36 թռչնաֆաբրիկայի արտադրանքի ներմուծումը

17:05 • 25.06.18

Ղազախստանի իշխանություններն արգելել են ռուսական 36 թռչնաֆաբրիկայի արտադրանքի ներմուծումը: Այդ մասին հայտնում է «ՌԻԱ Նովոստի»-ն՝ վկայակոչելով երկրի գյուղատնտեսության նախարարության մամուլի ծառայությանը:

Հաղորդվում է, որ նման որոշում է կայացվել Կուրսկի, Պենզենի և Սամարայի շրջաններում գրանցված թռչնագրիպի պատճառով:

Արգելքի տակ են հայտնվել նշված շրջաններից կենդանի թռչունները և հավկիթները, փետուրները, թռչնամիսը և թռչնաբուծական արտադրանքի բոլոր տեսակները:

Արգելվել է նաև այդ շրջաններից ջերմամշակում չանցած թռչունների կերի և կերային հավելումների, թռչունների համար օգտագործված սարքավորումների ներկրումը:

Թռչնաբուծական ձեռնարկությունների ամբողջ ցանկը, որոնց արտադրանքն արգելվել է Ղազախստան ներմուծման համար, ներկայացվել է նախարարության կայքում: