Մումբայում արգելվել են պլաստիկ իրերը

17:33 • 26.06.18

Հնդկաստանի Մահարաշտրա նահանգի Մումբայ քաղաքում արգելվել են պլաստիկ իրերը՝ տոպրակները, բաժակները, շշերը, ձողիկներն ու այլ առարկաներ, որոնք մարդիկ սովոր են օգտագործել ամեն օր:

Ինչպես նշում է The Guardian-ը, նոր օրենքը խախտողներին տուգանք ու նույնիսկ ազատազրկում է սպառնում:

Աղբյուրի հաղորդմամբ՝ այժմ ամբողջ քաղաքում տեսուչներ են աշխատում, որոնք հետևում են բնակիչներին ու բիզնեսի ներկայացուցիչներին՝ կանխելով պլաստիկի օգտագործումը:

Նշվում է, որ օրենքն առաջին անգամ խախտելու դեպքում սպառնում է 5 հազար ռուփի տուգանք (մոտ 73 դոլար), իսկ կրկնակի խախտելու դեպքում գումարն աճում է մինչև 25 հազար ռուփի (մոտ 366 դոլար) ու նույնիսկ 3 ամիս ժամկետով ազատազրկում սպառնում:

«Սա շրջակա միջավայրի աղտոտման խնդրի հրաշալի լուծում է, սակայն նաև՝ հսկայական խնդիր մարդկանց համար: Այստեղ մարդիկ ամեն ինչ պահում են պլաստիկ տոպրակների մեջ», - պատմել է քաղաքի բնակիչ Կամլաշ Մոհան Չաուդհարին:

Տղամարդը նաև պատմել է, որ այժմ ինքը գործվածքից պայուսակ է պահում իր մոտ, իսկ տեղացի մսագործը, օրինակ, սկսել է փաթաթել միսը թերթերի մեջ, այլ ոչ թե դնել տոպրակների մեջ: