ՊՊԾ գնդի գործով ամբաստանյալ Վարդգես Գևորգյանն ազատ արձակվեց կալանքից
Երևանի ընդհանուր իրավասության դատարանում ՊՊԾ գնդի գործով 11 ամբաստանյալների՝ Արմեն Լամբարյանի, Աշոտ Պետրոսյանի, Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Մանվել Աթոյանի, Վարդգես Գևորգյանի, Կարո Եղնուկյանի և Խաչատուր Գիչյանի քրեական գործով նիստին դատավոր Արտուշ Գաբրիելյանը բավարարեց ամբաստանյալ Վարգդես Գևորգյանին կալանքից ազատ արձակելու վերաբերյալ միջնորդությունը:
Այս մասին Tert.am-ի հետ զրույցում ասաց Վարդգես Գևորգյանի պաշտպան Լյուդվիգ Ավետիսյանը:
««Ծառուկյան դաշինք» խմբակցության պատգամավորներն անձնական երաշխավորություն էին ներկայացրել Գևորգյանի նկատմամբ կիրառվող կալանքը որպես խափանման միջոց անձնական երաշխավորությամբ փոխելու վերաբերյալ, ինչը դատարանը բավարարեց»,- ասաց Ավետիսյանը:
Նշենք, որ պատգամավոր Վահե Էնֆիաջյանն ու Գևորգ Պետրոսյանը երաշխավորել էին, որ Վարդգես Գևորգյանը, գտնվելով ազատության մեջ, կդրսևորի պատշաճ վարքագիծ, չի խուսափի իր դատավարական պարտականությունները պատշաճ կատարելուց, քրեական վարույթն իրականացնող մարմնի կանչով ներկայանալուց:
Մայիսի 31-ին դատարանը մերժել էր Վարդգես Գևորգյանին կալանքից ազատ արձակելու և նրա նկատմամբ ստորագրությունը որպես խափանման միջոց ընտրելու վերաբերյալ միջնորդությունը:
Նշենք,որ Վարդգես Գևորգյանին մեղադրանք է առաջադրվել ՀՀ քրեական օրենսգրքի 34-218-րդ հոդվածի 3-րդ մասի 1-ին կետով, 34-219-րդ հոդվածի 3-րդ մասի 1-ին կետով, 235-րդ հոդվածի 1-ին, 235-րդ հոդվածի 4-րդ մասով, 34-235-րդ հոդվածի 3-րդ մասով, 238-րդ հոդվածի 3-րդ մասի 2-րդ կետով, 268-րդ հոդվածի և 365-րդ հոդվածների 1-ին մասերով:










